TURA: Re·anggipa antio dontonggija mikkarang waanganichi Garo Hills-ni bang·a biaprangon a·arang be·dape aro chirang banne komibeoba sak 15 manderang siangna nangahani gimin, sianggipa manderangni nokdangrangna ex-gratia ba tangka paisani gita dakchakanirangko on·na da·o sorkari kamrangko ka·engaha aro bakan ia tangka paisarangko ia nokdangrangna sokatgnok ine Sombar salo, a·dokni Chief Minister Conrad K Sangma parakataha.
Batanggimin salrango, dontonggija mikkarang waanganichi a·arang be·dape aro chirang bannanichi komibeoba sak 15 manderang sina gita nangahachim aro bang·a manderangan saknaanirangkoba man·na nangahachim. A·arang be·dape aro chirang banne, bang·a nokdangrangan nokgri jamgri ong·e da·o neng·nikanirangkoba chagrongna nangtokengahachim.
Iandake a·sel ong·anirangchi Garo Hills gimikon manderang neng·nikanirangko chagrongna nangtokengani gimin an·tangni suk ong·gijaniko parakatengon, duko ga·akenggipa manderangna pilak nanga dakchakanirangko on·china aro nirok sandianirangko dakchina ua a·dokni C&RD Minister AT Mondal baksana Education Minister Rakkam A Sangma-na ge·etaniko on·atmanaha ine Chief Minister parakataha.
Garo Hills-o a·a be·dapgipa aro chi banenggipa biaprangko ua Mongolbar salo re·bae nianggen ineba Chief Minister parakataha.
Robibar salonin Garo Hills-o mikkarang adita namkalna a·bachengaha aro uandaken Sombar salode sal nabaenba manderangna rang·speataniko on·angaha.
Da·o mikkarang namkalangahaoba, an·tangtangna simsake aro mikrake dongchina gitaba Garo Hills-o songdongenggipa pilak manderangkon Chief Minister didiataha.
