TURA: Tura-ni Don Bosco College aro Bangladesh a·songni Caritas Mymensing Region-ni nangrime Tura-o ong·atanggipa Indo-Bangla Cultural Youth Camp-ko Sonibar salo matchotataha.
Ia Cultural Youth Camp-ko re·anggipa October 7 tarikoni October 12 tarikona ong·atangahachim aro ia Youth Camp-o India aro Bangladesh a·song damgnini A·chik chadamberang, jatni daka rikani, doka dam·ani, ku·aganani, chrok mesaani aro uandakgipa kamrangni gimin skie ra·grikna gita cholko man·aha.
Ia Cultural Youth Camp-ko a·bachengatani salo, GHADC-ni Deputy CEM Nikman Ch Marak, mongsonggipa sokgipa ong·e oprake on·angahachim aro ia Youth Camp-ko a·bachengatanio, Don Bosco College-ni Patron Fr Januarius Sangma, Guwahati-ni Vice Provincial Fr Bivan Rodriques Mukhim, Bangladesh-ni delegate Bulbul Mankhin, Don Bosco College-ni Associate Professor Dr Barbara S Sangma aro gipinrangba dongpae bak ra·angaha.
Ia saldokna ong·atanggipa Youth Camp-o a·song damgnini A·chik chadamberangko dingtangmancha Rongkem-o donggipa Nokpante aro Simsang chibimakoba nina gita rimangaha aro Rongkem-oni re·bapilani ja·man Bangladesh-ni A·chik chadamberang, ‘Kriton’-ko dake mesokangaha.
Ia Cultural Youth Camp-ko matchotatani salo, Caritas Bangladesh Region-ni Regional Director Apurbo Mrong, saksa mongsonggipa sokgipa ong·e bak ra·angaha aro ia tom·anio uni jakchi, ia youth camp-o bak ra·gipa a·song damgnini A·chik chadamberangna certificate-rangkoba on·angaha.
Ia youth camp-ko matchotatanio North Eastern Hill University (NEHU) Tura Campus-ni Director Prof Sujata Gurudev, A·chik Literature Society (ALS)-ni membor-rang aro gipinrangba dongpae bak ra·angtokaha.
