TURA: Adita salrangna skang, North Garo Hills a·jani A·dokgre songo, brine tarigipa chanako cha·e sak 80-mangni gita manderang saaniko man·na nangahani gimin North Garo Hills a·jani District Administration, ia a·selni bidingo sandirokna a·bachengataha.
Koborko man·soani gitade, adita salrangna skang, A·dokgre songni Chenanggre Stadium-o robol kal·ako nina re·anggipa manderang, ua biapo brine tarigipa chanako bree cha·ani ja·man bang·a manderangan saaniko man·na nangtokahachim.
Ia chanako cha·e saa man·gipa manderangko ta·raken sanna gita A·dokgre PHC-ona ra·angaha indiba uamangoni sakdokde obostarang namjabatahani gimin nambate sannaniko ra·na gita Guwahati aro Goalpara hospital-rangona watatako man·skaaha.
Indake ong·engon, ia cha·aniko cha·e saa man·gipa manderang pilakan da·o kenna nangaoni jokaha ine medical department-oni koborko on·ataha aro manderangni cha·e saa man·gipa cha·anikoba name porikka ra·e nina gita Shillong songjinmani laboratory-ona watataha ine u·iataha.
Koborko on·ani gitade, iani bidingo inquiry dakani report aro laboratory-o porikka ra·ani report-na da·o dipet official-rang sengkuenga.