TURA: Gambegre (ST) Legislative Assembly constituency-ni by-election-na Model Code of Conduct (MCC)-ko ra·gatangani ja·man, National People’s Party (NPP)-na kam ka·enggipa manderang, vote-rangko salna gita constituency-ni manderangna CGI sheet-rangko sualanichi MCC-ko pe·aha ine Trinamool Congress (TMC) matnangataha.
Iani bidingo TMC-ni Garo Hills district coordinator, Gambegre by-election-ni Returning Officer-na badi ka·doangaha.
TMC-ni Returning Officer-na badi ka·doangani gitade, NPP-na kam ka·enggipa manderang, Gambegre constituency-ni ning·o donggipa Aminda Simsang songo (polling station no. 2) CGI sheet-rangko sualaha. Ia badi ka·ani baksana manderangni agangipa kattarangkoba video ka·enba Returning Officer-na on·ataha.
“Gambegre by-election-ni tarikko ECI parakatani ja·manba NPP, ia kamrangko ka·kuaha aro ian MCC-ko pe·ani ong·aha. Iandake MCC-ni niamrangko pe·aniara name bewalo election ong·ataniko chonnikani gitaba ong·aha,” ine TMC-ni badi ka·doanggipa chittio parakataha.
Indake ong·engon, bang·bata polling station-rangon NPP, CGI sheet-rangko dandame donkuenga aro manderangna ia CGI sheet-rangko sualengkua ineba TMC matnangataha.
Iandake election-ni somoio manderangna bosturangko sualaniara niamko pe·asan ong·aija indiba ku·mitdu du·aniba ong·enga ine janapatengon, NPP-ni manderangna CGI sheet sualaniko champengchina aro election-ko nama bewalo ong·atchina TMC, election official-rangko didiataha.
