SHILLONG: Shillong airport-k dal·batatanichi a·dokna aro a·dokni tourism-na dingtanganiko ra·bana man·gen ine a·dokni Tourism Minister Paul Lyngdoh parakataha.
Lyngdoh-ni parakatani gitade, Shillong airport-ko dal·batatanichi Transport sector-o sak 3000-na baten chadamberang kamrangko ka·e cha·na cholko man·gnok.
Tourism director-ni dilanichi sorkarini songe on·gipa committee, pilak dolrang baksa tom·enba iani bidingo chanchirimanirangko dakjringenga ineba Tourism Minister parakataha.
“Anga an·tangba changgninade tom·anio bak ra·paenba Tourism sector-ni dingtang dingtang dolrangko grongaha. Shillong airport-ko dal·batatanichi a·dokna dal·bea dingtanganiko ra·bana man·gnok. Airport-ko dal·batatani chu·sokahaon manderangni songre songgabatna rama jal·langrango pangchakaniba komianggnok aro Transport department-ni kamrangko apalbatatanichi, komibeoba sak 3000-na baten chadamberangna kamrangko on·na man·gnok,” ine Lyngdoh aganaha.
Tourism department, bakan dingtang dingtang tourist dolrangko songgnok ineba ua aganaha.
“Skanggipao chinga, a·dokona re·baenggipa manderangna Meghalaya a·dokni gimin talate on·na sienggipa sak 50 chadamberangko seokchenggen aro a·bachengao chinga ia dolrangko, Sohra, Umiam aro Shillong-o dongen,” ine Lyngdoh aganaha.
Assam-ni taxi-rangko champengchina dabienggipa taxi association-ni bidingo sing·on, ia dolni membor-rangko committee bakan grongna sienga ine Lyngdoh parakataha.
“Gipin biaprangoni taxi-rangko Meghalaya-ona re·bana on·na man·jawa ine agananiara namen kragijani aro ra·chakna man·gijani ong·a. Iako a·dokni dingtang dingtang dolrangba jegalaha. Iako aganengon, an·chingni kamrangko namdapatna nangenganikosa an·ching nina nangenga. Da·o gita susaani chasongode manderang an·tangtangni namnikako ra·na ba seokna bil donga,” ine Tourism Minister aganaha.