AMPATI: Chadamberangni gisepo dilgipani gunko ong·atna aro jatni daka rikanirangko mesokna gita Mongolbar salo, District Sports & Youth Affairs-ni gita District Level Youth Exchange Program-ko South West Garo Hills a·jani Ampati-o donggipa Multi Facility Centre-o ong·atangaha aro ia program-o dingtang dingtang skulrango class 11-oni BA 3rd year-ona poraienggipa chatro chatrirang bak ra·angtokaha.
Ia Youth Exchange Program-ko ong·atanio District Sports Officer Saljagring M Marak, mongsonggipa sokgipa ong·e jinmana aganprakangengon, chadamberangan mikkang jatko aro a·songko dilnagipa ong·a ine dilgipani gunko aro jakni kamrangko skie ra·na nangani gimin aganangaha.
Ia Youth Exchange Program-ko ong·atanio dingtang dingtang susaanirang, jekai quiz competition, painting competition, group & solo folk dance competition, solo singing competition, group folk song competition aro uandakgipa dingtang dingtang susaanirangko ong·atangaha aro susaanirango chegiparangna boksisrangko suale on·angaha.
Quiz competition-o chegiparangara, skanggipao Springfield Higher Secondary School-ni Desagra A Sangma aro Karbingstone M Sangma aro gnigipao Nogorpara HS School-ni Mesime S Sangma aro Madona M Marak ong·a.
Painting competition-o chegiparangara, skanggipao Nogorpara HS School-ni Anania G Momin aro gnigipao Springfield HS School-ni Pisan M Sangma ong·a.
Solo folk song-o chegiparangara, skanggipa Anania G Momin aro gnigipao Grikbeanchi S Sangma ong·skaa. Solo folk dance-o chegiparangara, Nogorpara HS School-ni Joshmi M Sangma aro gnigipao Springfield HS School-ni Tensu D Sangma ong·a.
Group folk dance aro group folk song minggnion skanggipa boksisko Springfield HS School cheaha aro gnigipa boksisko Nogorpara HS School cheangskaaha.
Ia district level youth exchange program-o chegipa chatro chatrirang da·o Shillong-o ong·atna sienggipa State Level Youth Exchange Program-o bak ra·angskagen.
