Manderangni ka·saanichi Gambegre seat-ko chena ka·donga: Sadhiarani
TURA: Re·baenggipa November jani 13 tariko ong·atna sienggipa 56-Gambegre Assembly Constituency-ni by-election-o susana gita Budbar salo, Trinamool Congress (TMC)-ni candidate aro Dengnakpara GDC Constituency-ni MDC Sadhiarani M Sangma-ba an·tangni nomination lekkarangko Returning Officer-na on·angaha.
Sangma-ni nomination file ka·anganio, uni segipa aro a·dokni gitcham Minister Zenith Sangma, a·dokni gitcham Chief Minister Mukul Sangma, TMC-ni dingtang dingtang dilgiparang aro TMC-na chakpaenggipa manderangba unbaksa dongpaaha.
An·tangni nomination lekkarangko DC office-o Returning Officer-na on·angani ja·man kobor ra·timgipa manderang baksa agangrikengon, Gambegre constituency-o nangchongmotenggipa kamde rama jal·langrangko tarie on·anian ong·engani gimin ia by-election-o chegenchimode ua skanggipa rama jal·langrangkon namdapatchengna jotton ka·gen ine TMC-ni candidate aganaha.
Ia by-election-o ua National People’s Party (NPP)-ni Mehtab Chandee A Sangma, Congress-ni Jingjang Marak, BJP-ni Bernard N Marak aro gipin Independent candidate-rang baksa susaengon chena ka·dongengama ine sing·anina aganchakaniko on·angskaengon, Gambegre constituency-ni manderang una ka·saani gimin ua chegipa ong·na ka·dongenga ine Sangma parakataha.
“Kakketko agangenchimode anga ia election-o chena namen ka·dongmanchaenga, maina Gambegre-ni manderang angna ka·saa aro iako anga Gambegre constituency-ni pilak biaprangonan re·ange nikmanaha,” ine ua aganaha.
Ia by-election-o ua badia party-ni candidate baksa susagrikbatna sienga ine sing·on, a·dok sorkariko NPP-an dilengani gimin NPP-ni candidate Mehtab Chandee baksaan ua susagrikbatna ka·dongenga ine TMC-ni candidate Sadhiarani Sangma parakataha.
Gambegre by-election-na nomination file ka·aniko Sombar saloni a·bachengatahachim aro nomination file ka·ani bon·kamgipa salara October 25 tarik ong·enga.
