TURA: University of Science & Technology Meghalaya (USTM)-ni PA Sangma International Medical College-o a·doktangni chatro chatrirangna fee-ko komiatchina A·chik Conscious Holistically Integrated Krima (ACHIK) dol, University-ni Vice Chancellor Prof (Dr0 Gauri Dutta Sharma-ko didiataha.
Iani bidingo USTM-ni Vice Chancellor-na sedoatengon, University-ni ning·o donggipa PA Sangma International Medical College-o poraina gita dongimin fee ba gamna nanganirang agre rakdugaengani gimin ian a·dokni cholgri ong·pagipa chatro chatrirangnade namen neng·beani ong·enga ine ACHIK parakatenba, ia medical college-o a·dokni chatro chatrirangba poraipana cholko man·na gita dingtangmancha fee-ko komiatchina didiataha.
“Ia medical college-o Meghalaya a·dokni chatro chatrirangna, mongsongbate songadam nokadamrangoni re·bae poraina miksongenggiparangna dingtangmancha scholarship-ko ba fee watani cholrangko ra·gatgenchimode ian cholgri ong·pagipa chatro chatrirangna cholrangko on·ani gita ong·gen,” ine ACHIK parakataha.
Ia medical college-o chatro chatrirang, altubate fee-rangko gamna man·na gita dingtang dingtang dake fee gamani cholrang, jekai instalment basis, deferred payment ba ja·manchake gamna on·ani cholrangko ra·gatchinaba ACHIK didiataha.
Medical college-ko chalaianio dingtang dingtang sorkarini bikotgipa dolrang baksa bakrimna nangengani gimin janapatengon, “A·doktangni chatro chatrirangna subsidized seat-rangko on·na gita a·dok sorkari aro dingtang dingtang dolrang baksa bakrimgenchimode a·doktangni chatro chatrirangba ia medical college-o poraipana cholko man·genchim,” ine ACHIK parakataha.
Medical college-ko chalaianio a·dokni dingtang dingtang dilgiparang, skigiparang aro a·doko songdongenggipa manderang baksa agangrikgenchimode, manderangni nangnikanirangko nambate ma·sie ra·na man·gen ineba ACHIK parakataha.
