SHILLONG: Samagra Shiksha Abhiyan (SSA) skulrango skigiparangna upper-age limit ba kam man·ani bilsiko 45-ona bariatanichi skigipa gimikande namgniko man·jawa aro ian sorkarini dakmikanisan ong·enga ine All Meghalaya SSA School Teachers Association (AMSSASTA) parakataha.
Adita salrangna skangsan, SSA Government LP, UP ba secondary aro higher secondary skulrango skienggipa manderangna a·dok sorkari, upper-age limit ba kamna choliani bilsiko 45-ona bariatahachim aro SSA skigiparangna upper age limit-ko 45-ona bariatahani gimin skigiparang, a·dok sorkarini dingtang dingtang kamna advertise ka·anio bak ra·pana chol man·gnok ine a·dokni Education Minister Rakkam A Sangma parakatahachim.
Sorkarini iandake a·kanganiko jegalatskaengon, skigiparangni age limit-ko bariatanichi bang·gija skigiparangsan namgniko man·aigen ine AMSSASTA-ni president Peter Thyrniang parakataha.
Bilsi 45 gapna sienggipa pilak skigiparangande graduate ong·daldalgipa candidate-rang baksa susapana man·jawa ineba ua aganaha.
SSA skigiparangni upper age limit-ko sorkarini bariatanichi skigiparang, an·tangtangni dabianirangko gualkujawa ine janapatengon, uamang 100 percent-chi dormahako bariatchina aro skigiparangko Education department-o napatchina dabiangkugen ine AMSSASTA-ni president aganaha.
SSA scheme, 2026 bilsini March 31 tariko bon·gnok ine jangbingbanganiko bebera·jachina gitaba AMSSASTA, pilak SSA skigiparangkon didiataha.
