WILLIAMNAGAR: Re·anggipa October-ni 25 aro 26 tarikrango, brigipa changna 50 Drums Wangala festival ba dama bol 50-ko doke Wangala manianiko, Manda Nokpante A·chik Culture Society-ni gita, East Garo Hills a·jani Balchol A·bri songo ong·atangaha.
Ia Wangala maniani skanggipa salo, maniani nisanko songdoangenba, Rugala aro jatni kal·susaanirangkoba ong·atangaha.
Ia Wangala maniani gnigipa salo, dolbri Wangalgipa dolrang, Wangale mesokangaha aro ia salo, Meghalaya Legislative Assembly-ni Speaker, Thomas A Sangma, mongsonggipa sokgipa ong·e bak ra·angaha. Ia manianio, Williamnagar-ni MLA aro PHE Minister Marcuise N Marak baksana dingtang dingtang official-rangba bak ra·angaha.
Ia tom·anio, Meghalaya Assembly-ni Speaker Thomas A Sangma, jinmana aganprakangengon, ia 50 Drums Wangala manianiko ong·atrongengani gimin Williamnagar-ni MLA Marcuise N Marak-ko mittelpilangenba, Wangala manianikosan ong·ataigija A·chik jatni niam reti aro dingtang dingtang daka rikani program-rangkoba ong·atchina organizer-rangko didiangaha.
A·chikrangni dingtang dingtang dakbewal rikbewalrang, jekai ‘Nokchame gaani’ aro uandakgipa kamrangni bidingo manderangna u·iatna gita program-rangko ong·atna nangengani giminba Assembly Speaker janapangaha.
Ia tom·anio a·dokni PHE Minister aro Williamnagar-ni MLA Marcuise N Marak-ba jinmana aganprakangengon, ia 50 Drums Wangala manianiko ong·atanio chu·sokgipa ong·ahanina Manda Nokpante A·chik Culture Society aro sorkari official-rangko mittelpilangaha.
A·chikrangni daka rikanirangko ripingna nangengani gimin janapangengon, torom aro jatni daka rikanio dingtanggrikaniko ma·sie ra·china gita ua jolo songdongenggipa manderangko didiangaha.
Ia dama bol 50-ko doke Wangala manianiko ong·atanio Rapdikgre Wangala Group, Williamnagar Art and Culture Wangala Group, Williamnagar Government College, aro Manda Nokpante A’chik Culture Society bakko ra·e uamangni chrok mesaanirangchi manderangko an·saoatangbeaha aro uamangna ia Wangala manianio okamatako man·e re·bagipa manderangni jakchi boksisrangko on·angaha.
