SHILLONG: Meghalaya a·dokona, mongsongbate Khasi-Jaintia Hills a·jarangona rel gari ra·baaniko dingtang dingtang dolrang jegalsotokengoba, a·doko tourism-ko tang·doatna gita Guwahati-oni Shillong-ona ‘luxury rail network’-ko tarichina Meghalaya Tourism Development Forum (MTDF)-ni a·dok sorkarina ku·pattiangani ja·man iako Khasi Students Union (KSU) jegalatenba, ‘luxury rail network’-na jumang nike dongani pal a·dokona niam gri napsrukaniko champengna Inner Line Permit (ILP)-ko ra·gatchina dabiangtaiaha.
“High speed luxury rail network-na jumang nike dongjachina aro a·doko ILP-ko ra·gatna gita ma·mong sorkariko didiskachina chinga a·dok sorkari aro MTDF-ko aganna ska. Rel garirangko ra·baanichi niam gri napsrukaniko bariatani pal a·doko namroro silroroaniko ra·baani giminsa sorkari chanchina nangenga,” ine KSU-ni general secretary Donald V Thabah parakataha.
“A·dokona niam gri napsrukbaanirangko champengna gita rakgipa niamrangko ra·gatkujaskal Khasi aro Jaintia Hills a·jarangona rel garirangko ra·bana man·kujawa ine chinga a·bachengonin aganmanaha,” ineba ua gisik ra·atpiltaianiko on·angaha.
Meghalaya a·doko namroro silroroaniko nangnikjaengani giminde rel garirangko champengsoenga ong·ja ine talataniko on·angengon, Meghalaya a·doko gipin biaprangoni re·baenggipa manderangko nirokna gita rakgipa niamrang dongkujani gimin rel garirangko ra·baahaode gipin biaprangoni manderang altuaen, a·dokona re·bana man·aignok aro iani giminsa KSU, Khasi aro Jaintia Hills a·jarangona rel gari ra·napbaaniko champengenga ine Thabah parakataha.
“Uni giminsa 1971 bilsini March 25 tarikko cut off year dake, ILP, MRSSA aro uandake bilakgipa niamrangko ra·gatkujaskal, chinga Khasi aro Jaintia Hills a·jarangonade rel garirangko ra·napbana on·kujawa,” ine KSU-ni general secretary parakataha.
ILP donggipa Arunachal Pradesh, Mizoram aro Nagaland a·dokrang baksa tosusagenchimode ILP dongkugijagipa Meghalaya a·dokon namroro silroroaniba dongjabatenga ineba ua parakataha.
“2022-2023 bilsio Mizoram a·dokni per capita income gong 2,15,144, Arunachal Pradesh a·dokni gong 1,99,992 aro Nagaland a·dokni gong 1,45,537 ong·a indiba Meghalaya a·dokde gong 1,23,896-san ong·aia. Uni gimin ILP donggipa a·dokrangan ILP donggijagipa a·dokrangna batede namroro silroroanio ta·rakbatenga ine nikna man·enga,” ine KSU-ni general secretary parakataha.