SHILLONG: Meghalaya a·dokni Samagra Shiksha Abhiyan (SSA) skulrango skigiparangni kamko regularize ka·china dabitokengon, kamko regularize ka·na niamko ra·gatani bidingo sorkari chanchina skangba, SSA skulrango skigiparangko a·dokni Chief Minister Conrad K Sangma gronge agangrikna ku·rachakaniko on·ataha ine Sombar salo, Meghalaya SSA Schools Association (MSSASA)-ni president Aristotle C Rymbai, a·dokni Chief Minister-ko gronge agangrikeani ja·man parakataha.
Meghalaya a·dokni SSA skulrango skigiparangni kamko naljokatna gita dingtangmancha niamko ra·gatchina MSSASA, a·dok sorkarina jagni somoiko on·angahachim.
Chief Minister-ko gronge agangrikangani ja·man video gita press statement-ko on·atengon, “SSA skulrango skigiparangni kamko regularize ka·china dabienggipani bidingo sorkari gisiko nange jako ra·enga ine Chief Minister chingna aganataha aro iana niamko ra·gatani bidingo sorkari chanchie ja·kurangko de·na skang ua bakan ching baksa agangrikna chingko okamatgen ine ku·rachakaniko on·ataha,” ine Rymbai aganaha.
Chief Minister-ko gronganio uamang, SSA skigiparangni kamko naljokatna gita niamko ra·gatani bidingo Education department-ni tarigipa ku·pattianirangni gimin chanchirimangaha aro Chief Minister, uamangna ka·dongatani kattarangko aganataha ineba MSSASA-ni president parakataha.
Chief Minister baksa gronge agangrikaniko chu·sokgipa ong·aha ine janapatengon, “India a·songni gipin a·dokrango gitan Meghalaya a·dokoba SSA skigiparangni kamko naljokatna gita re·baenggipa salrangni gisepon sorkari niamko ra·gatgen ine chinga ka·dongenga,” ine Rymbai aganaha.
Adita salrangna skang, North Garo Hills a·jani Resubelpara-o Cabinet-ni tom·aniko ong·atanio skigiparangni nangnikanirangna chakpaanirangko on·ahani gimin ua pilak cabinet minister-rangkoba mittelpilataha.
“SSA skulrango skigiparangba, lower primary-oni higher secondary gadangona kingkingan sorkarini kamrangna dorgastorangko galpana man·na gita Chief Minister-ni dilanichi, skigiparangni upper age limit-ko bilsi 37-oni bilsi 45-ona bariatahani giminba chinga sorkariko mittelpilangaha,” ine MSSASA-ni president parakataha.