M’layao Tourism sector tang·dobatoroenga: Tourism Min

SHILLONG: Meghalayao nitogipa nika-nianirang aro an·senggipa biaprang dongani gimin A·doko Tourism sector ba tourism-ni a·baku namen tang·dororoenga, indake da·o ADB chamatgipa baksa A·dokni chamsogiminoniko kror 400-na batpilgipa project-rangko a·bachengatgnok.
A·doko Tourism-ni a·bako tang·doatna gita Asian Development Bank (ADB)-ni botatgipa kror 191 aro Tourism sector-ni dingtang dingtang kamrangna A·dokni chamsogiminoniko kror 227 tangk-paisarangko jakkalanggen ine Tourism Minister, Paul Lyngdoh Mongolbaro parakaha.
A·dok Sorkari “Tourism Buddies’’-ko a·bachengatnasienga, jeon a·dokni mongsonggipa tourist-rangni roram biaprango skie on·gimin chadamberangko rakkigen. Tourism-o bakrimgipa dolrang, a·dokona songre-songbatbagipa manderangni naljokgnina kam ka·gen, tourist-rangko dilgen aro tourist-rangni dongchak-cha·chakanirangni giminba uamang tik ka·e on·gen
Ia kamrangna komibeoba sak 70 mang chadamberangko rakkigen aro Tourism Director, chadamberangko rimnapani bidingo November jani gisepon mingsa tender-ko parakatgen. Ia Buddies ba bakrimgipa dolrang, guide dakgen, ku·sikko pe·time on·gen aro tourist-rangko dakchakgen.
Seokgimin chadamberangko Laitlum,  Wards Lake, Nohkalikai, Mawkdok, Krangsuri ugita dakgipa biaprango donatgen.
Tourism Minister indakeba u·iat je, Shillong Ropeway project-ni kamrangkoba November ja bijatchi mangoni a·bachenggnok aro kamrangko a·bachengna gita pilak dakgnirang gimikan tik ong·tokjok.
Luxury rail-ko ra·bana agangipani bidingo sing·on, ian Transport department-ni chanchigipa kamsa ong·a aro jedakgipa kamko a·bachengnaba State Cabinet-ni bimangosa kucholsan chanchie kam ka·gen ine Lyngdoh aganchakaha.
Da·o dipet luxury relko ra·baani giminde maming de·e mesokani dongkuja, unigisepo de·e ra·baanirang dongode Sorkari jekoba nigrike kam ka·gen, Minister aganaha.
Unomitingo, Shillong Cherry Blossom Festival re·baenggipa November  15 tarikoni a·bachenggnok, jekon DoNER Minister Jyotiraditya Scindia do·ga oprake on·anggen. Japan Sorkarioni sawa dilgipa re·baenba ia festival-o bakko ra·egenchim, uako A·dok Sorkari sengenga ineba Tourism Minister aganaha.
November  18-19 tarikrango lit Fest donggen aro uano Vikram Seth,  Shobha De gita dakgipa mingsinggipa lekka segiparang aro gipinrang bakko ra·anggen.