Rozgar Mela-o sak 207-na appointment letter-ko on·a

Shillong: Prime Minister Narendra Modi-ni a·songni chadamberangko biltango pangchakgipa ong·atna re·mikkange a·bachengatgipa scheme-ni gita Mongolbar salo Shillong-o Rozgar Mela-ko ong·atao Union Minister of State for External Affairs aro Textile Shri Pabitra Margherita bakko ra·aha. Indake Meghalaya-oni sak 207 chadamberangna appointment letter-ko suale on·aha. Jeoni 191 post-rang Post department-ni ong·a, ge 15 post Railways aro NIT Meghalaya-oni ge 1 post ong·a. A·songni gimik bakrango chu·gimik ge 51,000 appointment letter-ko suale on·angaha.
Shillong-o mela-ko ong·atao Meghalaya, Manipur, Nagaland, Mizoram, Tripura, Assam-oni chadamberang bakko ra·aha.
Minister, candidate aro uamangni nokdangna nama sikaniko on·aha aro mikkangchi nama bewalo kam ka·achi a·songna mikkim rasong ra·bachina didiangaha.
Rozgar Mela-ko a·songni dingtang dingtang dam 40 jolrango ong·ataha, ia tom·anio chu·sokgipa chadamberangna appointment letter-rangko on·aha, iako nike anga bilongen kusi ong·a ine Minister aganaha.
Rozgar Mela 2024-o anga bakko ra·na man·e bilongen kusi ong·a, chadamberangna a·songko mikkangchi dilnagiparang ong·a, uni gimin uamangko bilakatna nanga. Ia mela-ko ong·ataniara chadamberangni janggi tanganina namgipa chol ong·a ine Minister agankuaha.
Una skang Prime Minister Narendra Modi, Rozgar Mela-o bakko ra·e aganprakataon, sak 51,000 chadamberangna Government department-o dangdike on·na appointment letter-ko on·anggen ine videoconferencing gita aganaha.
Indake PM, Dhanteras-na nama sikaniko on·ataha. Aro appointment letter-ko man·gipa chadamberangna nama sikaniko on·ataha.