TURA: South West Garo Hills a·jani Zikzak songo donggipa Kasturba Gandhi Balika Vidyalaya (KGBV)-o toilet-rang, ringani chirang aro uandake nangchongmotgipa cholrang dongjani a·sel skulo poraienggipa chatrirang neng·nikanirangko chagrongna nangtokenga ine A·chik Holistic Awakening Movement (AHAM) Zikzak regional unit parakataha.
Iani bidingo South West Garo Hills a·jani Deputy Commissioner-na badi ka·e sedoatengon, Zikzak-ni KGBV-o toilet-rang dongjani a·sel aro ringani chirang dongjani a·sel skulo poraienggipa chatrirang neng·nikanirangko chagrongna nangtokenga ine AHAM Zikzak regional unit parakatenba, ia skulna pilak nanganirangko on·china gita didiataha.
“Adita salrangna skang chinga Zikzak-ni KGBV-ona re·ange nion, ia skulo poraienggipa chatrirangna toilet-rang dongjani a·sel buringrangonasa re·angna nangtokenga, skulo ringani chiba dongjae neng·nikanirangko chagrongna nangtokenga, skulni wilwilao fencing ba kaduulanirang dongjani a·sel poraienggipa chatrirangna kenchakna nangani ong·enga aro skulni classroom-rango bijoli dongjani a·sel bangkarangko watna man·jae poraienggipa chatrirang neng·nikanirangko chagrongna nangtokenga ine chinga nikna man·aha,” ine AHAM Zikzak regional unit-ni president Sengrak D Marak parakataha.
AHAM Zikzak regional unit-ni parakatani gitade, ia KGBV-ko 2012 bilsio kulichengani somoiode ia skulo classroom-rangba chu·onga gitan dongachim, bijoli aro computer-rangba chalaiengachim indiba da·ode ia skulo obostarang namjahani a·sel poraienggipa chatrirang neng·nikanirangko chagrongna nangtokengachim.
“Ia skulara me·chik bi·sarangna a·gilsakni seng·aniko on·gipa ong·ani gimin skulo poraienggipa chatrirangni namgnina aro naljokgnina pilak nanga ja·kurangko de·na nangchongmotenga,” ine AHAM Zikzak regional unit, South West Garo Hills a·jani Deputy Commissioner-na sedoatgipa chittio janapataha.
Zikzak KGBV-o toilet, ringani chirang dongjae neng·nikaniko man·enga: AHAM
Date:
Share post:
