TURA: South Garo Hills a·jani Chokpot C&RD Block ning·o donggipa dingtang dingtang village employment council (VEC)-rang, batanggimin ja 14-na an·tangtangni man·na nangenggipa hajirarangko man·tokkujaenga ine State Rural Employment Society-ni Mission Director-na badi ka·doangenba, an·tangtangni man·na nangenggipa hajirarangko ta·raken on·china mol·molataha.
Iani bidingo State Rural Employment Society-ni Mission Director-na badi ka·e sedoatengon, “Songo noko rama jal·langrang aro dingtang dingtang kamrangko namdapatna gita chinga MGNREGA-ni namgniko man·paenggiparang ong·e dingtang dingtang kamrangko ka·engachim indiba chingni man·na nangenggipa hajirarangko man·tokjaengani a·selan chinga neng·nikanirangko chagrongna nangtokenga,” ine Gasuapara C&RD Block-ni ning·o donggipa dingtang dingtang VEC-ni dilgiparang aro job card holder-rang parakattokaha.
Ia VEC-rang aro job card holder-rangni parakatani gitade, uamang an·tangtangna on·gimin kamrang pilakkon somoi gitan matchotate on·rongachim aro ia kamrangni sakkina uamang pilak lekkarangkoba on·tokmanahachim.
“Sorkarini ge·etani gitan chinga Aadhar card-rangkoba link ka·aha aro Aadhar card link ka·na man·gijagipa manderang, jemangan a·gilsakko watangmanahachim, uamangni death certificate-rangkoba chinga submit ka·manahachim indiba batanggimin ja 14-na chinga chingni sal 70-na batgipa hajirarangko man·tokkujaenga. Ia hajirarangchin chinga chingni nokdangrangko aldupaengachim indiba chinga hajirarangko man·tokjaengani a·sel nokdangtangtangko chalaianio bang·en neng·nikanirangko chagrongna nangtokenga,” ine Gasuapara C&RD Block-ni ning·o donggipa dingtang dingtang VEC-ni dilgiparang aro job card holder-rang parakatenba, uamangni hajirarangko ta·raken watatchina State Rural Employment Society-ni Mission Director-ko mol·molataha.
