SHILLONG: Gambegre Assembly constituency-osan ong·aigija Tura Lok Sabha constituency gimikon namroro silroroani dongjanina National People’s Party (NPP), an·tangtangni manderangkon matnangna nanga ine Sombar salo, Tura-ni Congress MP Saleng A Sangma aganaha.
Indita bilsirangna uni MLA ong·ani ja·manba Gambegre Assembly constituency-o pilakni gita namroro silroroanirang dongja ine matnangenggipani gimin sing·anina aganchakaniko on·angengon, iandakgipa kattarangko agananichi NPP-ni dilgiparang, an·tangtangni dilgipa PA Sangma sagi, jean Union Minister, Lok Sabha-ni Speaker aro ru·uta bilsirangna Garo Hills-ni MP ong·angahachim, ukosa chonnikani gita ong·engaha ine Saleng aganaha.
“Uni (PA Sangma)-ni jongsarigipaba minister-an ong·achim aro uamang Garo Hills ja·manchakkuenga ine chanchia ong·ode, uamang an·tangtangni manderangkon matnangna nanga maina bilsi 47-na sason ka·anide ramram katta ong·jaha,” ine Tura MP aganaha.
Saleng-ni aganani gitade, Congress dol amoba amjaoba Gambegre constituency-ni manderangde election-ko chemanaha.
“Chief minister-ni iandake nokdang ge·prakprakona aro gittimantiona re·roroe vote gilamaniko anga an·tangde changsaba nikkujachim maina ua an·tangni constituency-oba iako dakja,” ine Saleng aganenba, da·o uamang constituency-o chong·mot obostarangko nikna man·engaha ine parakataha.
“Ia election, uamangna skianiko on·aha maina chief minister, minister, speaker aro MLA-rang pilakan constituency-ona re·ange vote-rangko gilamengani gimin manderang, election-ko chemanaha,” ine ua aganaha.
Gambegre by-election-o BJP-ni susaenganichi Congress dolni cholrangko pe·ani gita ong·enga ine matnanganirangna aganchakaniko on·angskaengon, iandake agananiko ua ‘gokani’ agana gita janapatenba, BJP aro NPP dolrang, a·dokoba aro ma·mongoba apsan nangrime kamko ka·enga ine Tura MP parakataha.
Election-o NPP-ni dilgiparang, tangkani bil aro sorkarini kamrangko jakkalsretenga ine matnangatskaengon, NPP-ni dilgiparang una ong·ja indiba Gambegre-ni manderangnasa kenenga ine Saleng parakataha.
“Gambegre-o angni biming dongja ong·ode maini gimin uamang pilak dilgiparang baksa uano campaign ka·enga?” ine ua sing·doataha.
