TURA: North Eastern Hill University (NEHU) Tura Campus-o Pro-Vice Chancellor dongjani a·selo dingtang dingtang kamrangko ka·anio neng·nikanirangko chagrongna nangtokenga ine A·chik Conscious Holistically Integrated Krima (ACHIK) parakatenba, NEHU Tura Campus-na ta·raken Pro-Vice Chancellor-ko songe on·china NEHU-ni Vice Chancellor-ko didiataha.
Iani bidingo NEHU-ni Vice Chancellor-na sedoatengon, “NEHU Tura campus-o Pro VC dongjani a·selan university-o kam ka·enggiparang aro poraienggipa chatro chatrirangba neng·nikanirangko chagrongna nangtokenga. Uni gimin chinga nang·ko mande ra·bee, NEHU Tura Campus-na Pro VC-ko songe on·china mol·molatenga,” ine ACHIK-ni dilgiparang parakataha.
NEHU Tura Campus-na Pro VC-ko on·anichi, campus ning·o pilak nanganirangko aro chagrongna nangenggipa dingtang dingtang neng·nikanirangni namatna gita ta·raken ja·kurangko de·na man·gen aro campus-o kam ka·enggiparang aro poraienggipa chatrorangni dingtang dingtang neng·nikanirangko namatan baksana ia campus-o ong·atgni program-rangkoba somoi gita chu·sokatna altubatgen ineba ACHIK parakataha.
“NEHU Tura campus-na Pro VC-ko songe on·anichi university-ni pilak kamrangkon nambate chu·sokatna gita jolni manderang baksa nambate agangrikna man·gen aro ian Tura campus-ko pilakni gitan namroro silrorona dakchakani ong·gen,” ineba ACHIK-ni dilgiparang, NEHU-ni Vice Chancellor-na sedoatgipa chittio janapataha.
