SHILLONG: Sombar salo, Tura-ni Lok Sabha MP Saleng A Sangma, a·dokni Chief Secretary aro dingtang dingtang department-ni official-rang baksa Tura Lok Sabha constituency-ni ning·o ra·gatgipa Members of Parliament Local Area Development (MPLAD) scheme-rangko nipilangaha aro ia scheme-ni bang·bata kamrangkon matchotkujani gimin an·tangni suk ong·gijaniko parakangaha.
Bilsi 22-ni ja·manba MPLAD scheme-ni bang·a project-rangan matchotchipgija dongenga ine an·tangni suk ong·gijaniko parakatengon, ia pilak kamrangkon December jani gisepon matchotatchina Tura-ni MP, dingtang dingtang department-rangkon ge·etangaha.
Sangma-ni parakatani gitade, Rongjeng rikenggipa college-na chamatgipa gong lak 10 tangkarangoni lak 8.5 tangkarangko koros ka·ahaoba da·ona kingkingan ia college-ko rikani matchotkujaenga aro ian namen aiao inmanani ong·enga.
MPLAD scheme-ni kamrangko nirokna gita MPLAD Division-na pakwatmanahachim aro ia scheme-ni ning·o MP sakantian, bilsiprako gong kror 5 tangkarangko an·tangni constituency-na koros ka·na gita District Collector-na ku·pattina chol dongachim.
Parliament-ni Rajya Sabha Membor-rangba, an·tangtangko seokgimin a·dokrango a·ja damsa ba una bateba kamrangko recommend ka·na bil dongskaachim.
