SHILLONG: District Transport Office (DTO)-ara manderangna nangchongmotgipa office-rangoni ge·sa ong·e salantian ritchani ritcha manderang, an·tangtangni nangchongmota kamrangna ia office-ona re·angronga indiba Shillong-ni DTO-o mitam ‘dalali’-rang, manderangni baditaba jarang nanggipa kamrangko ta·rake matchotatna gita bang·bea tangkarangko ra·skaenga.
Mitam manderangni kobor ra·timgiparangna u·iatani gitade, Shillong-ni DTO-o saksa ‘Gora Da’ minggipa ‘dalali’ donga aro ia mande, office-o donge, manderangoniko tangka ra·enba, kamrangko ka·e on·skaenga.
Ia ‘dalali’-rang, garini registration nombor-rangko bodolanio, ba licence-rangko tarie on·anio ua uandakgipa dingtang dingtang office-ni kamrangna manderangoniko tangka bang·e ra·enba, kamrangko ta·raken matchotate on·ronga ineba kobor on·timgiparang parakataha.
Iandakgipa ‘dalali’-rang, office-ni bang·a manderangkon u·igiparang ong·e, manderangni ru·ute somoi nanggipa kamrangko ta·raken matchotate on·na man·aia indiba ia kamrangna uamang tangka paisarangko bang·e dabie ra·rongskaa ine mitam manderang aganaha.
Ia mande, ru·uta bilsirangnan ia office-o donge kamrangko ka·e on·enga indiba da·alonan darangba ia mandeni kamrangko champengna jotton ka·a dongkuja ine kobor on·timgiparang parakataha.
Iani bidingo East Khasi Hills a·jani District Transport Officer (DTO) R Hinge-o sing·sandiaton, kamrangko ta·rake matchotatna gita uamangde darangkoba rakkia dongja ine parakatskaaha.
“Manderangsa an·tangtangni kamrangko ta·rake matchotatna gita iandakgipa ‘dalali’-rangona re·ange tangkarangko gamenga,” ine ua talataniko on·angaha.
 |
ReplyForward
|
