TURA: West Garo Hills a·jao Phulbari Shyamding-oni Shyamnagar-ona dakanggipa North Eastern Council (NEC) PWD rama namsrangjahani a·sel re·ruraenggipa manderang aro jolo songdongenggipa manderang neng·nikanirangko chagrongna nangtokenga ine A·chik Conscious Holistically Integrated Krima (ACHIK) North Western Zone (NWZ) parakatenba, ia ramako ta·raken taripile on·china jolni MLA-na sedoataha.
Iani bidingo jolni MLA-na sedoatengon, Phulbari-Shyamding-oni Shyamnagar-ona dakanggipa rama namsrangjahani a·sel salanti re·ruraenggipa manderang, mongsongbate skul-college-rangchi re·enggipa chatro chatrirang, bading chiwalgiparang aro dingtang dingtang nanga kamrangna re·ruraenggipa manderang neng·nikanirangko chagrongna nangtokenga ine ACHIK parakataha.
Ia ramara Phulbari aro Shyamnagar jolrango songdongenggipa manderangna mongsonggipa rama ong·a ine janapatengon, ia ramako ta·raken taripile on·china aro ia ramako nirokjringe nanga gita taridape on·na NEC PWD-na ge·etaniko on·china jolni MLA-ko ACHIK didiataha.
