TURA: North Eastern Hill University (NEHU) Shillong aro Tura campus-na Pro-Vice Chancellor-ko songe on·china NEHU Students Union (NEHUSU), Khasi Students Union (KSU) NEHU Unit aro ACHIK dolrang dabitokengon, NEHU Tura Campus-na Pro VC-ko songe on·china gita Garo Students Union (GSU) aro GSU NEHU Cell-ba dabiangaha.
GSU-CEC-ni president Tengsak G Momin-ni parakatani gitade, NEHU-ni campus-rangko nambate chalaina man·na gitasa Pro VC-ni kamkoba bikotahachim indiba 2021 bilsionin NEHU Tura Campus-ko nirokgipa Pro VC dongjani a·sel NEHU-o kam ka·enggiparangsan ong·aigija ia campus-o poraienggipa chatro chatrirangba neng·nikanirangko chagrongna nangtokengachim.
“NEHU-ko 2021 bilsini September 24 tarikonin Pro VC gri chalaiengani gimin ian campus-ni chu·gimik bilrangko aro kamrangko champenga gita ong·enga. NEHU Tura campus-o qualify ong·gipa aro kam changgipa professor-rang kraa gitan donga aro campus-ko nirokna gita Pro VC-ko songanio neng·nikanirang dongna nangani kattaan dongjachim,” ine Momin parakataha.
Garo Hills-o NEHU gita dakgipa educational institute-na ru·uta bilsirangnan Pro VC-ko songe on·janiara ia campus-ko galchipani gita ong·enga ineba GSU parakataha.
NEHU Tura campus-ni Post Graduate Students Union (PGSU)-ko bon·atani giminba GSU suk ong·gijaniko parakataha.
“Chatro chatrirangni agananirangko knachakchenggijasa aro maming tom·anirangko ong·atgijasa PGSU-ko bon·ataha aro ian niamni a·palo ong·a. Kobor man·soani gitade, NEHU Tura campus-ni official-sa PGSU-ni president baksa jegrikani ong·katahachim indiba maini gimin dol gimikko bon·atna nangaha?” ine GSU-ni president sing·doangaha.
