SHILLONG: Re·baenggipa November 13 tariko Gambegre Assembly constituency-ni by-election-ko ong·atengon, ia by-election-ko National People’s Party (NPP)-an chena cholrang nambatenga ine Mongolbar salo, Tura-ni gitcham MP aro NPP-ni dilgipa Agatha K Sangma a·kangataha.
Iani bidingo kobor ra·timgipa manderang baksa agangrikengon, Gambegre constituency-oba namroro silroroaniko ta·rakbate man·na gita constituency-ni manderang, sorkario bak ong·gipa MLA-kosa nangniktokengani gimin ia by-election-ko NPP-an chena cholrang nambatenga ine Sangma parakataha.
NPP-ni candidate aro Chief Minister Conrad K Sangma-ni jikgipa Mehtab Chandee A Sangma nanga gita poraiani gadangrang donga aro uni u·i-ma·sianirangchin ua chegipa ong·gen ine janapatengon, Chief Minister aro uni pilak minister-rangan Gambegre-o vote-rangna bi·amenga ine Tura MP Saleng A Sangma-ni agananiko Agatha jegalataha.
“Politics-o kam ka·giparang an·tangtangni candidate-na rakbee kam ka·enga ong·ode aro Chief Minister an·tangan somoiko on·e kamko ka·enga ong·ode ian chingni gisiko nanganiko mesokanisa ong·enga. Election-kode maming saloba altue ra·na nangja ine chinga skie ra·manaha,” ine Agatha aganaha.
Tura-ni Congress MP Saleng Sangma-ni kosako matnangatskaengon, iandakgipa kamrangni bidingo Tura-ni MP name sandichengna nanga aro ua saksa MP ong·e skatang kattarangko aganna man·ja ine Agatha aganenba, Gambegre by-election-o susaenggipa pilak candidate-rangan namgiparang ong·a indiba ia election-o NPP-an skang ong·enga ine Agatha a·kangataha.
Tura Lok Sabha election-o amako man·aniara una dal·bea gimaani ong·aha indiba uamang skie ra·anichi re·mikkangangkuna nangenga ineba ua aganaha.