SHILLONG: Batanggimin bilsibrini gisepo a·doko maternal mortality rate ba an·pakani somoio ma·giparangni siani 50 percent-na baten komiangaha ine Budbar salo, Health department-ni Principal Secretary Sampath Kumar parakataha.
“Rakbee kamrangko ka·anichi a·doko an·pakenggipa ma·giparangni siani namen komiangaha. Batanggimin bilsibrini gisepo 50 percent-na baten an·pakenggipa ma·giparangni siani komiangaha indiba chinga iako komiatkuna nangnikenga,” ine Maternal Mortality Rate (MMR)-ni bidingo tom·e chanchirimani ja·man Kumar aganaha.
Health Principal Secretary-ni aganani gitade, a·doko an·pakenggipa ma·giparangni sianiko champengna gita MMR-ni bidingo antiprakon tom·e chanchirimenba, nanga kamrangko ka·enga.
Iana agreba, an·o donggipa aro sok kaneggipa ma·giparangna simsak nirokaniko on·na gita a·dok sorkari, Chief Minister’s Motherhood Scheme (CM-SMS) program-ko a·bachengataha ineba Kumar parakataha.
Ia scheme-ni ning·o sorkari, Garo Hills-o diltubatsranggipa Purakhasia PHC-o an·o donggipa me·chikrangna palang ge 10-ko on·aha ineba ua parakataha.
Batanggimin somoirangode ultrasound dakna gita doctor-rang dongjachim ine janapatskaengon, iani bidingo sorkari, Tamil Nadu sorkari baksa bakrime Tamil Nadu-o sak 60 doctor-rangko train ka·aha ine Health official parakataha.