SHILLONG: Bharatiya Janata Party (BJP)-ko ‘Hindu party’ ine dingtang dingtang dolrang matnangna jotton ka·engoba ian Gambegre election-o maming nangchakeaniko ra·bajawa aro uamang ia by-election-ko chena gita gisiko nange kamko ka·aigen ine Budbar salo, BJP-ni dilgipa aro a·dokni Cabinet Minister AL Hek parakataha.
“Skangonin dingtang dingtang dolrang BJP-ko iandake matnangna jotton ka·enga aro ian maming gitalni kattaba ong·ja. Indiba manderang kakketko ma·sia aro ian maming dakeba party-na nangchakeaniko ra·bajawa,” ine Hek aganaha.
BJP-ko ‘Hindu party’ ine matnangako jegalatengon, ua an·tangba Kristianan ong·a indiba BJP-ni MLA-ba ong·a ine Hek parakataha.
“Manderangna angan toe niani ong·china aro anga BJP-o ong·aiana Hindu-ni dakbewalko ja·rikgen ia katta ong·ja. Badia party-na aro badia candidate-na pu·onna uade manderangni skaniosa,” ine ua aganaha.
Tura Lok Sabha election-o NPP-ni amako man·anina BJP-ko matnangaha ine mesoke on·anina aganchakaniko on·angengon, “Lok Sabha election-ode chinga NPP-na chakpaanirangko on·aha indiba ia changode chinga an·tangtangba susaenga. Iandakgipa matnanganirangde da·osan ong·ja indiba skangnin donga,” ine BJP Minister aganaha.
Ia by-election-o BJP-ni susaanian Gambegre constituency-na namroro silroroaniko ra·bana mikonganisa ong·enga ineba ua aganaha.
“Chingni mongsonggipa miksonganian namroro silroroaniko ra·baanisa ong·enga. Gambegre constituency-ni manderang BJP-na pu·onode namroro silroroanirang sokbaaigen ine chinga ku·rachakenga. Manderangna Prime Minister-ni a·bachengate on·gipa bang·a scheme-rangkon ra·bae on·na man·aha. Uni gimin uamang bang·bate namgnirangko man·na sikenga ong·ode uamang BJP-na pu·onna nanggen,” ine Hek aganaha.
Gambegre constituency-o namroro silroroani dongsrangjama ine sing·anina aganchakaniko on·angskaengon, “Constituency-ona re·ange nigenchimosa kakketkode ma·sina man·gen aro anga an·tangde da·o dipet Gambegre-ona re·angkujani gimin chanchichipe agananisan ong·aia,” ine Hek parakataha.
BJP aro Congress dol bakrime kmako ka·enga ine NPP-ni matnanganikoba ua raken jegalataha.
“Congress dolba an·tangtangni miksonganirang aro candidate donga, apsan daken chingaba dingtang miksongani aro candidate donga. Chinga Congress baksa bakrime kam ka·ani katta dongja,” ine BJP Minister parakataha.
 |
ReplyForward
|