TURA: North Eastern Hill University (NEHU)-ni registrar, deputy registrar aro niam gri kamo rakkia man·gipa official-rangko ra·galchina NEHUSU, NEHUTA aro uandakgipa dingtang dingtang dolrang, Shillong-o dabie jingjengatanirangko daktokengon, Tura-oba chatro chatrirang, dingtang dingtang dolrangni bakrimanichi, ia official-rangko ra·galchina aro Tura campus-na Pro-Vice Chancellor-ko songe on·china dabie Budbar salo, NEHU Tura campus mikkango jingjengatanirangko dakangtokaha.
Ia jingjengatanio, GSU,GSMC aro uandakgipa dingtang dingtang dolrangba bak ra·angtokaha aro uamangni dabianirangko knachakjaskal, NEHU Tura campus-ni gate-ko chipe donna tik ka·angaha.
“Niam gri kamo rakkia man·gipa official-rangko ra·galpilchina dabianio chingaba bakrimaniko on·enga aro unbaksana Tura campus-na Pro VC-ko songe on·china aro Post Graduate Students Union (PGSU)-ko songpiltaichina gitaba chinga dabienga,” ine jingjengatanio bak ra·giparangoni saksa Ph.D chatro Amsrang Momin aganaha.
Da·o dipet NEHU Tura campus-ko Pro VC gri, campus director-chisa chalaiengani a·sel campus-o kam ka·enggiparangsan ong·aigija chatro chatrirangba neng·nikanirangko chagrongna nangtokenga ine jingjengataniko dilenggipa manderang parakataha.
NEHU Tura campus-o bangbang ong·e dongenggipa kamrangko gapatna nangchongmotenga ine dabiangskaengon, Tura campus-o bus garirang chu·ongjani a·sel, campus ning·o cholrang dongjani a·sel, campus-o ringani chirangko chu·onga gita man·jaengani a·sel aro uandakgipa dingtang dingtang a·selrangchi poraienggipa chatro chatrirang neng·nikanirangko chagrongna nangtokenga ine Amsrang parakataha.
Ia jingjengataniko ong·atani bidingo GSU-CEC-ni president Tengsak G Momin-ba talate on·angengon, uamang NEHU-ko dilenggiparangna ming 12 dabianirangko on·ahachim indiba ia dabianirangko da·alonan chu·sokatkujaenga ine parakataha.
NEHU Tura campus-na ta·raken Pro VC-ko songe on·na nanga aro Tura campus-ni PGSU-ko songpiltaina nanga ineba GSU president dabiangaha.
NEHU Tura Campus-oba niam gri rakkigipa official-rangko ra·galchina dabie jingjengata
Date:
Share post:
