SHILLONG: India a·song gimikon Uniform Civil Code (UCC)-ko ra·gatgenchimoba Bharatiya Janata Party (BJP), Tribal-rangna chanchigipa aro mande ra·gipa ong·ani gimin Meghalaya a·dokko man·chape pilak Tribal a·dokrangon ia niamoniko Tribal-rangkode wataha ine Budbar salo, BJP-ni dilgipa aro a·dokni Cabinet Minister AL Hek parakataha.
India a·songni je biaprango UCC-ko ra·gatgenchimoba Tribal-rangkode ia niamoniko watgen aro iano maming jajana nangani katta dongja ine adita salrangna skangsan Union Home Minister Amit Shah-ba parakatahachim.
Indake ong·engon, UCC-oniko Tribal-rangko wataniara pilak Tribal a·dokrangon BJP-ni bidingo manderangni chanchianiko dingtangatani ong·gnok ine Hek aganaha.
“A·dokni manderang aro Tribal-rangni nangnikanirangko BJP knatime aro iani giminsa Meghalaya a·dok gita dakgipa pilak Tribal a·dokrangon UCC-ko ra·gatjana tik ka·aha,” ine ua aganaha.
Hek-ni aganani gitade, Tribal-rangko UCC-oniko wataniara BJP, manderangna chanchigipa aro Tribal-rangni nangnikanirangko ma·sichakgipa ong·a ine mesokani ong·enga.
UCC-ko Tribal a·dokrango wataniara a·doko BJP-ko ra·chakna chol ong·engama ine sing·anina aganchakaniko on·angskaengon, “Ian Meghalaya a·doko BJP-ko election-rango chena chol on·ani ong·naba gnang,” ine BJP Minister aganaha.
UCC-ni kosako a·dokni Chief Minister Conrad K Sangma-ba ku·rangko on·e, ian a·songo dingtang dingtang jat aro toromni dakbewal rikbewalko pe·ani ong·enga ine aganahachim.
 |
ReplyForward
|
