SHILLONG: Dingtang dingtang political dolrang re·baenggipa MDC election-rango susana gita tarisotokengon, UDP dilgipa aro Cabinet Minister, Kyrmen Shylla indake aganaha je darang voter-ba uamangni dilgiparangko opposition-o asongako nangnikja.
Sonibaro koborni manderangna aganengon, Shylla jean Khliehriat-ni MLA-ba ong·enga, sason ka·gipa dolo dongosa manderangna namroro-silroroaniko ra·bana gita cholrang dongbata ine ua aganaha.
“Opposition-o donggenchimode manderangna kakketko ra·bana man·ja” ine aganengon, voter-rang gimikan uamangni MLA-rangko ruling-o ong·atna sika aro Opposition-ode dongatna siktokja ine Shylla aganaha.
Re·baenggipa MDC poll-rango VPP-ni ra·bianirangko mikkangchakna tarienga ine sing·anina aganchakengon, VPP-ni kattarangkosan knaaijachina gita Minister, manderangko didiaha.
“Manderang ia chango uamangni kattarangko knachakna nangja indiba VPP uamangni ku·rachakanirangko chu·sokatna man·ama man·ja ukosa manderang niatna nanga,” ua aganaha.
Re·baenggipa MDC election-rangna United Democratic Party (UDP) tarisoengaha aro candidate-rangko seokchina district-ni dilgiparangnan jakgitel cholko on·manaha ine Shylla unskanga aganahachim.
Jaintia Hills-ni adita constituency-rangna party da·o dipet candidate-rangko namedake seoksrangna man·kuja, indake ong·genchimoba da·o Jaintia Hills Autonomous District Council (JHADC)-o MDC ong·engipa sakdoknade re·baenggipa MDC election-rango party tikitrangko on·telgen ine ua aganaha.
