SHILLONG: Ia chasongni election-rango pripraesa vote-rangko on·e dilgiparangko seokrongani gimin sorkariko rikanio political dolrang, dingtang dingtang dolrang baksa bakrimnan nangao ga·akaia ine United Democratic Party (UDP) parakataha.
UDP-ni general secretary Jemino Mawthoh-ni parakatani gitade, Meghalaya Democratic Alliance (MDA) baksa bakrimengoba mikkang bilsio ong·atna sienggipa Khasi Hills Autonomous District Council (KHADC) election-o UDP-na maming nangchakeani dongjawa.
NPP-chi dilenggipa MDA sorkari, tangka paisarangko jakkalsretanina aro dingtang dingtang kamrango chu·sokgijanirangna matnanganirangko man·engani gimin KHADC election-o UDP-na nangchakeanirang donggenma ine sing·anina Mawthoh, ia kattarangko aganchakaha.
“Meghalaya a·doko an·ching ru·uta bilsirangnan bakrimgipa politics-ko nikna man·engaha. Ia chasongara bakrime rikgipa politics-ni chasong ong·a aro badiaba political dol, dolsanchi chegopna man·jahaode sorkariko rikna gita gipin political dolrang baksa bakrimna nangrongaia,” ine ua aganaha.
Sorkariko jedakeba rikchina a·dokna namroro silroroanikosa ra·bana man·na nanga aro sorkari kim·kimgipasa ong·na nanga ineba UDP-ni general secretary aganaha.
UDP, MDA-ni bak ong·aiani gimin nangchongmotgipa kamrangni bidingo ku·rang on·jawa ia katta ong·ja ineba ua aganskaaha.
“Chingaba tangka paisa jakkalsretani aro cha·bokanirangko jegalgiparangan ong·a. Maiba kamo ong·jaengaha ine nikode chinga pangnan uko jaksi otronga. Iandakgipa kamrangni bidingo chinga jrip dongenga ong·ja,” ine ua talataniko on·angaha.
