TURA: Batanggimin somoirango ong·gija kamrangna biming man·ani ja·man da·o Gambegre by-election-ko ong·atanioba songni mandeko dokanina aro election-ni niamrangko pe·anina Boldamgre-ni MDC Stevie Marak-ni kosako FIR ka·doangtaiaha.
FIR-ko Jembragre songni saksa Jostview D Sangma minggipa mande, Mongolbar salo, Damalgre police station-ni officer-in-charge-na ka·aha.
Ia mandeni FIR-o janapani gitade, Mongolbar pringwalni 1:00 bajimango, Jembragre songni manderang, election-o susaenggipa dolrangni aro candidate-rangni tangka sualaniko champengna nitimengmiting somoio, Boldamgre-ni MDC Stevie Marak, ia songona re·angenba, ia mandeko kragija dake jak sokaha aro songni gipin manderangko silchidare mesoke ka·mikkenataha.
“Election Commission-ni dongimin niam gitade, November 11 tarik attamni 4 bajion campaign ka·na dongimin somoi bon·ahani gimin Gambegre constituency-ni ning·o campaign ka·ani, sakbongana bate tom·ani aro gipin constituency-rangoni re·bagipa manderangni ia constituency ning·o donganiko champengatahachim indiba ia MDC-ni kamrangara, Election Commission-ni dongimin niamrangko pe·ani gita ong·aha,” ine Jostview D Sangma, an·tangni FIR-o parakataha.
Ia MDC-ni silchidare mesoke ka·mikkenataniko jegalatengon, election-ni somoirang ong·gija dake jakkalsretaniko champengna miksonganion Arms Act-ni ning·o pilak silchidarerangkon police station-rango donechina ge·etaniko on·ahachim indiba ia MDC-ni kamara, Election Commission-ni dongimin niamko pe·anisan ong·aigija, Arms Act-ni ning·o dongimin niamrangko pe·aniba ong·aha ine Sangma, FIR-o parakataha.
