TURA: 56-Gambegre (ST) Legislative Assembly Constituency-ni by-election-na pu·onaniko da·al Budbar salni bako ong·atengahani gimin ia by-election-ni pu·onanio kamko ka·na gita donatako man·gipa polling dolrang, mijal Mongolbar salni bakon, an·tangtangna tikatgimin polling station-rangona re·chakatangtokaha.
An·tangtangna tikatgimin polling station-rangona re·chakatangna skang polling dolrang, Tura-ni Deputy Commissioner (DC) office-oniko polling ba pu·onanio jakkalna nanggipa ma·manti bosturangko aro lekkarangko ra·angtokaha.
Gambegre constituency-ni ning·o pu·onna bilko man·gimin manderang gimik 33,091 donga aro ia sak 33,091-oni sak 16881-de me·asarang aro sak 16,207 voter-rangde me·chikrang ong·a. Sakgittamde service voter-rang ong·a.
Ia 56-Gambegre (ST) LAC-ni by-election-na 38-Okkapara aro 43-Bolchugre Polling Station-ko Model Polling Station dake donsomanaha aro 23-Kherapara polling station-ko Women Polling Station dake donenba, 34-Sentapara aro 35-Sentapara Polling Station-ko Youth Managed Polling Station ba chadamberangchi chalaigipa polling station ine donskaaha.
