A·dokni 4th teacher-rangko regularize ka·china dabia

TURA: Meghalaya a·doko 4^th teacher-rangba gipin skigiparang gitan apsan gadango apsan kamrangko ka·paenga ine All Meghalaya 4^th Teachers Association (AM4thTA) Garo Hills unit parakatenba, a·dok gimikni sak 1521 4^th teacher-rangkoba kamo regularize ka·china aro dormaharangko bariatchina a·dok sorkariko didiataha.

Association-ni vice president Tangseng Marak-ni parakatani gitade, adita salrangna skang a·dok sorkari, MSSASA, AMSSASA aro AM4thTA-ni dilgiparang baksa tom·aniko ong·atangon, 4^th teacher-rangkoba kamo regularize ka·china association-ni dilgiparang, Education department-ni Commissioner & Secretary-ko didiataha.

“A·doko 4^th teacher ong·e kam ka·enggiparang, ru·uta bilsirangonin kamko ka·tokenga aro bang·bata skigiparangan da·o gipin kamrangko ka·pana gitaba dongimin bilsirang batahani gimin kamna dorgastoko galna man·tokpajaha,” ine AM4thTA-ni vice president parakatenba, a·doko 4^th teacher ong·e kam ka·enggipa sak 1521 manderangko kamo regularize ka·china sorkariko didiataha.

Gipin skigiparang gitan 4^th teacher-rangnaba apsan dormahako on·china sorkariko didiatskaengon, SSA UP, Adhoc UP aro Deficit UP skigiparangde jao 20,000 batpilen dormahako man·enga indiba 4^th teacher-rangde da·onan gong 18,000-kosan man·paenga ine association-ni vice president, an·tangni suk ong·gijaniko parakatenba, uamangnaba dormahako bariate, gipin skigiparang gitan apsanko on·china sorkariko mol·molataha.

Una agreba, Meghalaya a·doko kam ka·soenggipa skigiparangna special MTET-ko ong·atchina gitaba AM4thTA Garo Hills unit, a·dok sorkariko didiataha.