Tura: Butbar salo gnigipa changna salgnina ong·a-tengipa Me·gong International Literary Festival-ko Tura DC Park-o Meghalaya a·dokni Education Minister Pa Rakkam A Sangma a·bachengate on·angaha.
Indake ia maniani a·ba-chenggipa salo Bangladesh-ni A·chikrangba sok-baaha aro Tripura, Assam a·dokrangoniba sokbae bakko ra·angaha. Dingtang dingtang college aro university-rango skigiparang aro poraienggipa chatro chatrirangba re·bae bakko ra·angtokaha.
“Jatni daka rikani, ku·sik aganani aro dingtang ding-tang skangni ja·rikba-enggipa bewalrangko an·ching ripingna gita ki·taprangko sena gita nanga, unigimin sea jotta-niko tang·doatna gita iandakgipa program-rangko ong·atjringna gita nanga, jedakode iandakgipa program-rangona an·tang-tangni changa sapaniko mesokna gita aro skie ra·na gita chadamberangna chol ong·gen” ine Pa Rakkam Sangma tom·anio jinmana aganangaha.
Indake ia tomaniona sokbagipa gipinrangara Rangsakona-ni local MLA Pa Subir Marak, Don Bosco Colleg-ni Principal Rev. Father Januarius Sangma aro gipinrangba dongpaa.
A·chik Literature Society (ALS) aro Don Bosco College, Tura baksa North-Eastern Hill University (NEHU) Tura-ni Garo department apsan nangrime program-ko ong·ataha. “Garo-rangni ku·sik agana, se jotani aro daka rikani” iano pangchake 2024 November 27 tarikoni 28 tarikona salgni manianiko ong·atenga.
Maniani bako, kinggni ki·taprang jekon Dr. Rhinkle M Marak-chi segipa (1) Indo-Bangla Cultural Youth Camp Documentation, aro (2) Gisikni Ku·birong -II ki·taprangko monsonggipa sokgipachi oprakangaha.
NEHU Tura Campus, Garo department-ni Head Dr. Jacqueline R. Marak-chi academic session-o lekkarangko mesoke agan-talatangaha aro unbaksana Dr. Tharsus K. Sangma aro Mr. Kroshnil D. Sangma-chi gisiko nangatani kattarangko aganangaha. Aro minggipin session-ni bako Garorangni se jotani aro daka rikani bewalrangni bidingo Tura Don Bosco College-ni Assistant Professor Dr. Colnat B. Marak-chi agan-talatangaha aro bon·kame aganang-giparangara jekai Ladipson Sangma (Karbi Anglong, Assam), Dr. Tharsush K. Sangma (Goalpara, Assam), Mr. Liang Ritchil (Bangladesh), aro Mr. Traibin Marak (Tripura).
