TURA: November-ni 29 aro 30 tarikrango salgnina Me·gong Festival-ko Jengjal jolo donggipa Baljek Airport-o ong·atengani gimin, November 29 tarik pring 6:00 bajioni a·bachenge, December 1 tarik pring 6:00 bajiona kingking, Snalgre-oni Tura-ona dakbagipa National Highway (NH-51) rama gita dal·dalgipa truck garirangni re·ruraaniko champengna West Garo Hills a·jani District Magistrate, Section 163 BNSS-ni ning·o ge·etaniko on·angaha.
Me·gong Festival-ni somoio manderang aro gari gorarang naljokaniko man·china aro gari gorarangni re·ruraanio maming neng·nikanirangko man·jana gita District Magistrate, ia ge·etaniko on·angaha.
November 29 tarik pring 6:00 bajioni December 1 tarik pring 6:00 bajiona kingking, Snalgre-oni Tura-ona dakbagipa NH-51 ramao National Highways & Infrastructure Development Corporation Limited (NHIDCL) aro Public Works Department (PWD)-ni dal·dalgipa ostrorangchi kam ka·atanirangkoba dontongchengchina District Magistrate ge·etaniko on·ataha.
Ia niamko saoba pe·genchimode BNSS-ni Section 223-o pangchake sastirangko man·gen indiba ia niamrang, ambulance, fire service, police ba uandakgipa nangchongmotgipa kamrangnade nangchakeani dongjawa ine District Magistrate u·iataha.