SHILLONG: Manipur a·doko so·sojengjeng ong·aniko namatchipna man·jaengani a·sel bang·a manderangan neng·nikanirangko chagrongna nangtokengani gimin Northeast Indigenous People’s Association (NIPA)-ni general secretary Bostone M Sangma aro gipin dilgiparang, Manipur a·dokni gitcham chief minister aro National People’s Party (NPP)-ni national vice president Yumnam Joy Kumar-ko grongenba, Manipur a·doko tom·tomaniko ra·bapilna man·na gita dingtang dingtang dolrang baksa bakrime kam ka·china didiangaha.
“Chingni uko gronge agangrikanio ua (Yumnam), Manipur a·doko tom·tomaniko ra·bapilna gita uamang rakbee kamrangko ka·enga ine chingna aganataha aro chingni Meghalaya Tura-oni re·ange uamangko grongeahani giminba ua chingko mittelpilataha,” ine Sangma parakataha.
NIPA-ni dilgiparang, Manipur a·doko BJP-ni state vice president ong·e kam ka·enggipa Laishram Meenabanta-koba grongeaha aro dingtangmancha Manipur a·doko tom·tomaniko ra·bapilchina didie segipa memorandum-koba on·angaha ine u·iataha.
