TURA: Garo Hills-o Meghalaya Grassroot Music Project (MGMP)-ni ning·o git ring·gipa aro dokgipa dam·gipa manderangna somoi gita tangka paisarangko gamjaengani a·sel neng·nikanirangko chagrongna nangtokenga ine matnangatenba, iani bidingo inquiry-ko dakchina dabiangtokaha.
“Tangka paisarangko somoi gita gamjan baksana tangka paisarangko jakkalsreta aro mitamrangode project-ni miksongani gitaba ong·jaenga. MGMP-ko chu·sokgipa ong·atna chinga rakbee kamrangko ka·engoba somoi gita tangka paisarangko gamjaengani a·sel chinga tangka paisani gita neng·nikanirangko chagrongna nangtokenga. Batanggimin jagittamni gisepo chinga dingtang dingtang biaprango gitrangko ring·aha indiba chingna somoi gita tangka paisarangko gamjaha. Tangka paisarangko somoi gita gamjaengani a·sel chinga an·tangtangko dakchakna aro doka dam·anio tang·dopana man·jaenga,” ine Garo Hills-o MGMP-ni ning·o gitrangko ring·enggipa aro dokgipa dam·gipa manderang parakataha.
Ia MGMP-ara git ring·ani aro doka dam·aniko tang·doatna miksonge ra·gatgipa program-sa ong·genchimoba ia program-ni ning·o chrokgiparangko aro dakmesokgiparangko bak ong·atengani giminba ia manderang, an·tangtangni suk ong·gijaniko parakattokaha.