SHILLONG: North Eastern Hill University (NEHU)-o poraienggipa chatro chatrirang aro kam ka·enggipa manderangni jegalaniko man·e November 30 tarikona chutti ra·angani ja·man NEHU-ni Vice Chancellor Prof Prabha Shankar Shukla, an·tangni chuttiko December 13 tarikona ra·dodapataha.
NEHU-ni VC, November 30 tarikona chutti ra·angahani gimin December 2 tarikode kamtangona re·bapilani ong·ahachim aro uandaken uko jegalenggipa chatro chatrirang aro gipin dolrang, uko jegalsona gita NEHU campus-o jinma tom·chimongsotokahachim indiba ja·mano uni chutti ra·dapani bidingo NEHU-ni acting VC Prof Nirmalendu Saha, chatro chatrirangna aro gipin dolrangna parakataha.
NEHU-ni VC Prof Shukla-ko kam ra·galchina dabie, NEHU Students Union aro KSU NEHU Unit, university-ni gate-rangko chipe donna tik ka·ahachim.
Prof Shukla-ni chutti ra·dapangani gimin kobor ra·timgiparangna u·iatengon, ua November 13 tarikoni December 13 tarikona an·tangni chuttiko ra·dodapataha ine NEHU-ni acting VC Prof Saha parakataha.
“Anga an·tangde iani bidingo tale ma·sija indiba Prof Shukla-ko chutti ra·dapchina Education Ministry u·iatahakon. Da·o dipet NEHU-o ong·enggipa obostarangni bidingo membor sakgnini committee-chi inquiry-ko dakkuengani gimin uko Education Ministry, chutti ra·dapchina aganahakon. Uni gimin ua December 13 tarikona kingkingde University-ona re·bakujawa,” ine Prof Saha aganaha.
Acting VC-ni parakatani gitade, NEHU-o ong·enggipa obostarangni bidingo inquiry dakenggipa committee-na ministry, sal 15 somoiko on·dapahani gimin da·o dipet inquiry report-koba man·kujaenga.
NEHU-ni VC baksana Registrar aro Deputy Registrar-ko kam ra·galchina dabie NEHUSU aro KSU NEHU Unit, jingjengatanirangko dakengani a·sel University-o jasamang ong·na sipile class-rangkoba ra·na man·kujaengachim.
Class-rangko a·bachengpiltaina nangengahani gimin ua ta·raken Academic Council-ni tom·aniko ong·atanggnok ineba Prof Saha parakataha.
 |
ReplyForward
|