TURA: Adita salrangna skang ong·atanggipa Gambegre by-election-o National People’s Party (NPP)-ni candidate aro Chief Minister Conrad K Sangma-ni jikgipa Mehtab Chandee A Sangma-ni cheani ja·man Indian National Congress (INC) aro Trinamool Congress (TMC) dolrango suk ong·gijanirangko nikna man·enga aro iani gisepon TMC-ni dilgipa Mukul Sangma, an·tangni wate katbagipa Congress dolona re·angpilna miksonganirang dongenga ine jangbingbanganirangko knasona man·ahaon bang·a manderangni gisepon ia dal·begipa sing·ani ong·katenga.
Mukul Sangma Congress dolona re·angpilna miksonganirang donga ine jangbingbanganirangko knasona man·engon adita salrangna skangsan Meghalaya Pradesh Congress Committee (MPCC)-ni president Vincent Pala-ba uamangni gisepo agangrikanirang dongjringenga ine parakataha. Indake ong·genchimoba, Mukul-ni Congress-o napaniko AICC-ni dilgiparangsa tik ka·gen ine Pala parakatskaaha.
TMC-oni koborko on·ani gitade, da·o dipet Mukul Sangma-ni Congress-o napangpilna sienga ine jangbingbanganirangko name tik ong·e aganna man·kujaenga indiba TMC-ni bang·bata dilgiparangan Meghalaya a·doko, I-PAC-ni jak on·paenganina suk ong·niktokjaenga maina I-PAC-ni jak on·paanichi election-rango TMC-ni candidate-rangna namgni ong·ani pal batesa namjabataniko ra·baskaengachim.
2023 bilsini Assembly election-o TMC, seat dambongakosan chena man·aiaha aro ia Assembly election-o TMC-ni chena ka·dongahaoba dambongamangmang seat-ko cheaniara ia dilgiparangni Congress-ko wate TMC-o napanganina manderangni suk ong·gijaniko mesokaniba ong·skaahachim.
“Garo Hills-o TMC-kode West Bengal-ni party inesa bang·a manderangan ra·toka aro Garo Hills-ni manderang bang·an Mukul Sangma-ko namniktokgenchimoba TMC-ko ra·chakna man·tokja,” ine Tura-ni saksa SR Sangma aganaha.
Da·o Mukul Sangma, Congress dolona re·angpilna sienga ine jangbingbanganirang ong·katskaengon, ua Congress dolona re·angpilbebegenchimode manderang changsataie uko bilona ra·bapilskaani cholrangba donga ine mitam manderang aganskaaha.
