SHILLONG: Mongolbar salo, CM Connect program-ko West Khasi Hills a·jani Nongstoin Block ning·o donggipa dingtang dingtang songrangna ong·atangaha aro ia program-ko ong·atanio, dingtang dingtang songni dilgiparang aro jolo songdongenggipa manderang, an·tangtangni neng·nikanirangko aro nanganirangko a·dokni Chief Minister Conrad Sangma-na aro sorkari official-rangna parake on·na cholko man·aha.
Ia program-ko ong·atanio, Nongstoin Block-ni ning·o donggipa dingtang dingtang songni manderang aro dingtang dingtang dolrang, songni nokni rama jal·lang, health centre, tourism, skul nok, aro uandakgipa dingtang dingtang kamrango chagrongna nangenggipa neng·nikanirangko aro namdapatna nangenggipa kamrangko a·dokni Chief Minister aro sorkari official-rangna janape on·angtokaha aro iandakgipa neng·nikanirangko aro manderangni nanganirangko niatchina gita Chief Minister, sorkari official-rangko ge·etangaha.
Manderangna an·seng baljokanirangko on·na sorkarini ka·enggipa kamrangni bidingo janapatengon, manderangni namgnina dingtang dingtang health centre-rangko namdapatna sorkari kam ka·enga ine Chief Minister parakataha.
Nongstoin Civil Hospital-ko namdapatna gita sorkari bakan kamko a·bachengatgen ineba ia tom·anio Chief Minister ku·rachakaniko on·angaha.
Kal·susaanirangko nambatatna gita sorkari, gong crore 1000-na baten tangka paisarangko koros ka·enga ineba ia tom·anio Chief Minister parakataha.
Jolo donggipa self help group (SHG)-rangni nanganirangko knatime ra·angengon, SHG-rangni nanganirangko chu·sokatna gita ua Union Finance Minister baksa agangrikgen ine Sangma ku·rachakaniko on·angaha.
Songni ramarangko tarie on·china mol·molani bidingo aganchakaniko on·angengon, ia CM Rural Connect program-ni ning·o adita rama tariani project-rangkoba ra·gatgen ine Chief Minister parakataha.
Songni manderang an·tangtangni neng·nikanirangko sorkarina janaptoka
Date:
Share post:
