BOKO: Assam a·dokni Chaygaon revenue circle ning·o donggipa dingtang dingtang A·chik songrangona Forest department-ni manderang re·angenba, dal·baenggipa gue bolrangko den·e galanina jegalgrime, Budbar salo dingtangmancha jinma tom·bimonganiko Nogodonga songo ong·atangaha.
Ia tom·aniko, Garo National Council (GNC), Garo Women Council (GWC) aro Garo Youth Council (GYC) dolrang nangrime ong·ataha aro ia tom·anio dingtang dingtang A·chik songrang, jekai Kinangaon, Larubama, Hangkumari, Santipur, 1 No. Nogodonga, 2 No. Nogodonga, Rajapara, Upper Rajapara, Jongakhuli, Nadiapara, Ukium aro uandakgipa songrangoni sak 500-na baten manderang bak ra·angtokaha.
Ia tom·anio, GNC-ni president Enindra Marak, jinmana aganprakengon, November 28 tariko Forest department-ni manderang, Nogodonga songona re·angenba songo ge·gipa komila aro gue bolrangko, songni manderangna u·iatchenggija den·galtokaha ine an·tangni suk ong·gijaniko parakataha.
Chaygaon Revenue Circle-ni ning·o 23, 29 aro 30 nombor-ni a·arangko para on·engachim ine janapatengon, ia a·arango donggipa pang 1000-mangni gita dal·drobaenggipa gue bolrangko maming u·itchenga gri den·e galaha ine Marak parakataha.
Ia tom·anio, Majhata songni saksa Ronindra A Sangma-ba jinmana aganprakengon, Forest department-ni manderang, ia jolrango donggipa A·chik songrangkosan napdraeming kragija dakenga indiba Rabha, Boro aro gipin jatrangni songdongenggipa songrangonade re·angrongja ine an·tangni suk ong·gijaniko parakataha.
West Kamrup Forest Division-ni ning·o donggipa Larubama songoba Forest department-ni manderang, gue baganrangko nosto ka·e galaha aro Hakumari songoba manderangni nok-jamrangko nisie galaha ineba ia tom·anio manderang matnangtokaha.
Iani bidingo Bamunigaon Range Officer Aminul Islam-o sing·sandiaton, ia a·arangara Bogai Reserve Forest-ni ning·o ga·akgipa biaprangsa ong·a aro ia forest reserve-o ga·akgipa pilak baganrangkon den·e galchina West Kamrup Forest Divisional Officer Subodh Talukdar ge·etaniko on·ataha ine parakataha.
Songni manderang, tangka paisarangko ra·sroesa ia baganrangko dake cha·engachim ine songni manderang, ia tom·anio suk ong·gijaniko paraktokaha.
Forest department-ni kosako songni manderang, Gauhati High Court-o mokordoma ka·na gitaba tik ka·angaha.
Assam-o A·chikrangni gue baganrangko nosto ka·e galanina jegalgrima
Date:
Share post:
