SHILLONG: Manderangni ka·oksibee nichaksoenggipa Autonomous District Council (ADC) election-rangko re·baenggipa 2025 bilsini February 22 tariko ong·atnaba gnang.
Sombar salo, a·dokni Cabinet tom·aniko ong·atangenba, Khasi Hills Autonomous District Council (KHADC) aro Jaintia Hills Autonomous District Council (JHADC) election-na tarisogimin sal somoirango ra·chakangaha.
District Council election-ko ong·atani bidingo a·dokni Chief Minister Conrad K Sangma, kobor ra·timgiparangna u·iatengon, election-na tik ka·gimin sal somoirangko Meghalaya a·dokni Governor ra·chakkujaskal, jinmana parakna man·kujawa ine aganaha.
Indake ong·genchimoba, KHADC aro JHADC election-ko mikkang bilsini February jao aro February jani 22 tariko ong·atnaba gnang ine kobor on·timgiparang parakatskaaha.
KHADC aro JHADC election-ko ia bilsini gisepon ong·atani ong·ahachim indiba constituency-rangko gital dake sualpiltaiahani gimin ia district council damgnini term-kon jadokna ra·dodapatahachim.
KHADC (Constitution of District Council) (Amendment) Rules, 2024, aro JHADC (Constitution of District Council) Amendment Bill, 2024-ko a·dokni Governor CH Vijayashankhar ra·chakangani ja·man KHADC aro JHADC-ni election-ko ong·atna skang, constituency-rangko sualpiltaina a·bachengataha aro uandaken da·o ia district council damgnio susana sienggipa candidate-rang, sualtaigimin gital constituency-rangoni susana tarisamsotokskaengaha.