Assamni manderang M’layaona re·bae matchu cha·ena man·gen: Rakkam

SHILLONG: Assam A·doko restaurant aro jinmani biaprango matchu be·en cha·aniko champengatengon, Assam-Meghalaya sima ariogipa Meghalaya-ni a·jarango ga·sugipa hotelrangko kuliatskachina gita NPP Minister, Rakkam Sangma, Meghalaya Sorkarini ku·pattiaha, jedakode Assamni manderang uarangona re·baenba matchu be·enrangko cha·e kusi ong·na man·gen.
Assamni niam ra·gatgipani bidingo koborni manderangna aganengon, Assam Sorkarini bilko jakkalani gimin, Meghalaya Sorkari iako chol ra·skana nanga aro Assamni ripengrangna matchu be·en song·arangko cha·ena man·na gita Meghalaya Sorkari, Assam-ni sima-ari sepangjolo donggipa Khanapara, Byrnihat aro Paikan jolrango 5 star hotel-rangko rikskana nanga ine Rakkam Sangma aganaha.
“Assamni ripengrang chingona re·bae matchu song·arangko cha·enba re·angpilna gita man·gen aro ian Meghalaya-ni economy-ko tang·doatskagen,” Pa Sangma aganaha.
Darangba darangni cha·a-ringani kosako champengna bil dongja ine aganengon, ua an·tangde BJP legislator Sanbor Shullai agangipa cha·anirangnaba dunagni bate cha·a, ua aganaha.
“Sanbor Shullai, saksa BJP dilgipa ong·e matchu b e·en cha·na man·ode, gipin BJP dilgiparang maina cha·na man·jawa” ineba Pa aganaha.
Assam Sorkarni ja·ku de·gipa kamko jechake aganengon, pilak kamon apsan ong·ani aro uni bite gnang.
“Anga Hindu ripengrangko duk man·atna sikja” ineba ua aganaha.
Bang·a jatrangni brine songdonggipa a·songo, iandakgipa niamrangko ra·gataniara namen rasong griani ong·a, jeon batanggimin bilsi 75-na kingking pilak jat-toromrang apsan ku·mong melie songdong-a·chatokenga, Pa Sangma aganaha.
“Indakgipa chanpengani niamrangko ra·gataniara da·lgipa a·songni chugipa gadango ong·aniko ra·ongala gitasan ong·aigen’’ ineba NPP dilgipa aganaha.
‘‘Matchu den·aniara Hindu manderangna suk ong·gijani ong·naba donga indiba A·chikrangko man·chape bang·a tribal-rangan matchu den·gijade uamangni ka·sagiminrangko gopja’’ ine wate re·anggipa Pa PA Sangma sagini kattako gisik ra·ate ua aganaha.
“Jedakgipa festival-ko chinga matchu den·gijade manija aro matchu den·gija maming manianiba chingo dongja,” ua agandapaha.