SHILLONG: Assam a·doko matchu be·en cha·aniko champengatahani gimin Meghalaya a·dokoba nangchakeaniko man·na kenchakanirang dongengon, Assam gita Meghalaya a·dokona ra·baenggipa matchurangko ba uandakgipa dingtang dingtang bosturangkoba champengjachina, South Shillong-ni MLA aro BJP-ni saksa dilgipa Sanbor Shullai, Assam-ni Chief Minister Himanta Biswa Sarma-ko mol·molataha.
Assam-o matchu be·en cha·aniko champenganichi Meghalaya a·dokoba matchu aro uguta dakgipa matburingranko palanio neng·nikanirangko man·enga ine janapatengon, Assam-o matchu be·en cha·aniko champengahani a·sel opposition dolrang, iako a·song gimikon champengna gita NDA-ni dongnugimin kam ine ra·skaengaha ine Shullai parakataha.
Iani bidingo Assam-ni Chief Minister-na seachi u·iatengon, “Salgro salaram a·dokrango dingtang dingtang jat aro toromni manderang donga aro mitam jatrangni cha·ani ringanide uamangni dakbewal rikbewalan ong·a. Chinga darang jat aro toromni kosako re·giparang ong·ja indiba Assam-o matchu be·en cha·aniko champengatanichi Meghalaya a·dokoba manderang dongtogijaniko man·na a·bachengaha,” ine a·dokni BJP MLA parakataha.
Shullai-ni parakatani gitade, manderangni cha·ani ringani bewalara a·doktangtangni bewalsa ong·aia ine ma·mongni dilgiparangba talataniko on·manahachim indiba mitam a·dokrango matchu be·en cha·aniko champengatani gimin opposition dolrang, iani bidingo manderangna tol·e sakki on·skaengachim.
Assam-o matchu be·en cha·aniko champengatanichi Meghalaya a·doko, mongsongbate da·o Krismas aro Bilsi gitalni somoirango manderang neng·nikanirangko chagrongnaba gnang ineba Shullai, an·tangni jajrengchakenganiko parakataha.
Meghalaya a·dokara dingtang dingtang a·dok aro a·song baksa nangchapgipa a·dok ong·e, ma·manti bosturangko gipin a·dokrang gita, mongsongbate Assam a·dok gitasa ra·bana nangenga ine janapatskaengon, iandake Assam gita salbaenggipa matchu aro ma·manti bosturangko champengrikengani a·selan a·dokni manderang neng·nikanirangko chagrongna nangronga ine BJP MLA parakataha.