TURA: Sombar salo, Tura-ni District Social Welfare Office-ni gita, seoka man·gipa Celebral Palsy ba gisik sokmanjae be·enni gita cholgri ong·gipa manderangna Customised Adaptive Chair-rangko suale on·angaha.
Ia program-ko ong·atanio, Tura-ni Sub-Divisional Officer (SDO) Sadar, Manish Kumar, mongsonggipa sokgipa ong·e bak ra·angaha aro be·enni gita cholgri ong·gipa manderangna Customised Adaptive Chair-rangko sualataha.
Ia program-ko Tura-ni District Social Welfare Office, District Resource Centre Disability Affairs aro Shillong-ni State Resource Centre on Disability Affairs nangrime ong·atangaha.
Ia program-ko ong·atanio Tura-ni SDO Sadar Manish Kumar, jinmana aganprakengon, ia program-ko ong·ataniara, be·enni gita cholgri ong·gipa manderang, an·tangtangni janggi tanganio chu·sokgiparang ong·na gita sorkari aro dingtang dingtang dolrangni nangrime kam ka·aniko mesokani ong·enga ine parakataha.
Ian dingtanganiko ra·baani chasong ong·enga ine janapatengon, iandake be·enni gita cholgri ong·ani aro songsalo champenganiko sorkari, songsal aro technology-ni jak on·paanichi pe·na gita man·gen aro uamangni janggi tanganiko altubatatna man·gen ine Kumar aganaha.
Ia Customised Adaptive Chair-rangko, be·enni gita cholgri ong·gipa joltangni manderangan, New Delhi-o skie ra·ani ja·man tariaha ineba SDO Sadar parakataha.
Ia program-ko ong·atanio, Tura Civil Hospital-ni Senior Physio-Therapist aro DRCDA Manager Sujata Das-ba jinmana aganprakengon, Cerebral Palsy-ni chinrang aro sanna banani cholrangko jinmana agan-talate on·angaha.
Ia program-ko ong·atanio be·enni gita cholgri ong·gipa manderangna Customised Adaptive Chair-rangko suale on·angan baksana ia chair-rangko tarigipa manderangnaba certificate-rangko on·angjolaha.
Ia program-o dongpae bak ra·anggipa gipin manderangara, Tura-ni District Social Welfare Officer Madonna T Sangma, UDID Project Garo Hills Region-ni Assistant Coordinator Jerry Chingre B Sangma, DSWO-ni Supervisor Stern HB Marak aro gipinrang ong·a.
