SHILLONG: Sombar salo, Meghalaya SSA Schools Association (MSSASA)-ni membor-rang, Shillong songjnmani Jaiaw Students Field-o tom·e chanchirimangenba, skigiparangni jingjengatna tik ka·aniko dontongatchengaha.
MSSASA-ni president Aristotle C Rymbai-ni kobor ra·timgiparangna parakatani gitade, November-ni 18 aro December-ni 4 tariko tom·e agangrikna sorkari okamahani gimin Sombar salo, uamang tom·e chanchirimenba, uamangni jingjengatna manchianiko dontongatchengaha.
“Chingni nangnikanirangko chinga sorkari baksa agangrikna nangnikengani gimin chingni jingjengatna manchianiko chinga dontongatchengna tik ka·aha,” ine Rymbai aganaha.
2020 bilsini July 1 tarik ba una skang kam ka·sogimin pilak SSA skigiparangkon, Meghalaya Teachers’ Eligibility Test (MTET)-oniko watchina uamang sorkariko ku·pattie on·na aro mol·molna tik ka·aha ineba Rymbai parakataha.
“Meghalaya a·doko MTET-ko nangtelgen ine 2020 bilsini July 1 tariko a·dok sorkarini u·iataniko on·anion tale janapahani gimin 2020 bilsini July 1 ba una skang kam ka·sogipa pilak SSA skigiparangkon MTET-oniko watchina chinga sorkariko mol·molgen,” ine MSSASA-ni president aganaha.
Meghalaya a·doko SSA skigiparangni kamko regularize ka·na gita niamko ra·gatani bidingo aro skigiparangni dingtang dingtang nangnikanirangko agangrikna gita empowered committee-ko songchina gitaba MSSASA, a·dok sorkario dabiangaha.
Rymbai-ni parakatani gitade, ia empowered committee-o Law, Personnel, Finance, Planning aro Education department-ni official-rang baksana MSSASA-ni membor-rangkoba bak ong·atchina uamang nangniktokenga.