SHILLONG: Meghalaya a·doko drugs ba pekatgipa samrangko jakkalani aro niam gri badingsrukanirang batroroengani gimin iandake drugs jakkalani aro badingsrukaniko champengna gita a·doko skanggipa Anti-Narcotics Task Force (ANTF) Police Station-ko kuliaha aro ia police station-ko Mongolbar salo, a·dokni Chief Minister Conrad K Sangma, Shillong songjinmani Golf Link-o donggipa MPRO Office Building-o kulie on·angaha.
Ia ANTF Police Station-ko kulie on·anio, a·dokni Deputy Chief Minister Prestone Tynsong, Social Welfare Minister Paul Lyngdoh, Health Minister Ampareen Lyngdoh, DGP Idashisha Nongrang, ANTF-ni SP Jagpal Singh Dhanoa aro dingtang dingtang official-rangba dongpae bak ra·angaha.
Ia ANTF police station-ko kulianiara police department aro a·dok sorkarina namen mongsonggipa sal ong·aha ine ia police station-ko kulie on·anganio Chief Minister janapatengon, a·doko drugs jakkalani aro niam gri badingsrukaniko champenganio ia police station-ni mongsonggipa daitorangkoba talate on·angjolaha.
“Ia police station-ko ramram dake aro da·o dipet namen chone niknaba gnang indiba ia police station-ko kulianichi, pekatgipa samrangko jakkalani aro badingsrukaniko warachakanio namen dal·begipa biteko an·ching nikna sienga,” ine ua aganaha.
Ia police station-ko Krismasna skang matchotna man·ahani gimin ua, a·dokni Deputy Chief Minister Prestone Tynsong, Director General of Police (DGP) Idashisha Nongrang aro ANTF-ni Superintendent of Police (SP) Jagpal Singh Dhanoa-koba mittelpilangaha.
Drugs jakkalaniko warachakani bidingo janapatengon, ia warachakaniara department ge·samangmangni kam ong·ja indiba ia kamo police, health aro social welfare department-rangba bak ong·enga ine Chief Minister aganaha.
Drugs jakkalani aro badingsrukaniko champenganio, a·doko songdongenggipa manderangko, dingtang dingtang jatni dilgiparangko aro dingtang dingtang gittimni manderangkoba bakrimchina gita Chief Minister didiangaha.
Ia ANTF police station-ara, drugs jakkalani aro badingsrukaniko champengna kam ka·anio apsan chanchirime kam ka·na aro niroke kamrangko ka·na gita mongsonggipa biap ong·gen aro ia police station-o additional SP, inspector, sub-inspector, constable-rang baksana IT-ni gita dakchakanirangba donggen.
