MPOWER-ni ning·o sorkari bilsi 3-na Magic Bus India Foundation baksa songgigrika

SHILLONG: Meghalaya a·dokni sorkari skulrango dal·drobaenggipa bi·sarangna Life Skills, Employability Education aro Foundational Literacy & Numeracy program-ko on·na gita Meghalaya sorkari, Meghalaya Program for Adolescent Wellbeing, Empowerment & Resilience (MPOWER)-ni ning·o bilsi gittamna Magic Bus India Foundation baksa bakrima songgigrikaha.
UDISE+ 2021-22 report-ni gitade Meghalaya a·doko Class 1-oni Class 12-ona biming segatgipa chatro chatrirang sak million 1-mangni gita donga aro ian primary-ni sak 5,30,390, upper primary-ni sak 2,44,088, secondary-ni sak 1,17,496 aro higher secondary-ni sak 63,044 chatro chatrirangko man·gopa.
Ia curriculum-ko skanggipa bilsio South West Khasi Hills, West Jaintia Hills, aro West Garo Hills a·jarango Life Skills Class-rangchi a·bachenggen.
Ia program-ni bidingo a·dok sorkarini Development Commissioner aro Principal Secretary Sampath Kumar talate on·angengon, lekka porani a·bao chagrongna nangenggipa neng·nikanirangko namatna sorkari rakbee kam ka·enga ine parakataha.
Sorkari baksa Memorandum of Understanding (MoU)-o soi ka·grikanio Magic Bus India Foundation-ni Global CEO Jayant Rastogi-ba talate on·angengon, “Dal·drobaenggipa chadamberangni u·i-ma·siani aro changa sapanirangko kulina gita MPOWER program-ko a·bachengatahani gimin chinga Meghalaya sorkariko mittelna ska. Dal·drobaenggipa chadamberangni u·i-ma·siani aro an·seng baljokaniko namdapatanichi, lekka porani kamrangko namdapatanichi aro India a·songosan ong·aigija a·gilsakni dingtang dingtang biaprango kamrangko ka·e cha·na cholrangko on·anichi ia program, somoini kri nanganirangko chu·sokatna man·gen,” ine parakataha.
Ia program-ni bak gita Shillong-o Magic Bus India Foundation-ni kuligipa Youth Skilling Centre, 2024-25 bilsini gisepo sak 150 me·trarangna skie on·e, janggi tangani cholrangko on·anggen.
Meghalaya sorkari aro Magic Bus India Foundation-ni MoU-o soi ka·grikanio dongpae bak ra·anggipa gipin manderangara, Education Department-ni Commissioner & Secretary Vijay Kumar Mantri, Health & Family Welfare department-ni Additional Secretary aro NHM-ni Mission Director Ramkumar, Education Department-ni Secretary Swapnil Tembe aro gipinrang ong·a.