Shillong: BJP dol uamangni chanchie ra·bagipa “One Nation One Election”-ko dingtang dingtang a·sol mamlarangoniko manderangko damrangni barianio ong·ja maina, scam jekai Adani mamla ong·ja maina aro gipinrangoniko bringbrangatna ra·bagipa mangmangsan ong·a, ine MPCC chief, Vincent H Pala aganaha.
Saffron party ma·sia Parliament-o iako ra·chakna man·teljawa maina one-third bang·bate chakpaaniko iano nanggen.
“Indiba BJP dol uamangni chu·sokgijanirangko pindapna nangnike manderangni gisikko dingtang dakgipa bakona salangskaenga,” ine Pala aganaha.
“One Nation, One Election-o Parliamentary Committee-ni gimin janapataon indine aganaha, BJP dolni donmitape ra·bagpipa agenda-de Lok Sabha, Assembly aro local bodies election, district council-rangko man·chape apsan miksonganio ong·atna nangengaonin a·dokrangni party-rangko bon·atna ian chanchigipa ong·enga,” ine ua aganaha.
Uni parakatani gitade, uamangni agenda chu·soka ong·ode a·dokni party-rang namen neng·nikaniko man·gen.
‘Indiba an·ching ia BJP-ni chanchia jakkaltogipa ong·genma ong·jawa sengna nanggen,” ine Pala aganaha.
Democracy-o jedakgipa party-rangko bon·atna ba sinjetaniko on·a bil dongja uni gimin ia BJP-ni re·chakatgipani kosako party namnikja ine MPCC chief aganaha.
“An·ching manderangni nanganiko mande ra·na nanga aro an·ching manderangko dilsretna nangja. Iani a·sel one nation one election-na chanchiako party namnikja,” ine ua agandapangaha.
