TURA: Bhutan a·songni ro·ongrangko niam grisa Meghalaya a·dok gita Bangladesh a·songona salangenga ine Tura-ni social activist Cherian Momin matnangatenba, Meghalaya a·dok gita ro·ong salruraaniko champengatchina a·dokni Chief Minister Conrad K Sangma-ko didiataha.
Iani bidingo a·dokni Chief Minister-na seachi u·iatengon, Bhutan a·songni ro·ongrangko Meghalaya a·dok gita Bangladesh a·songona salaniara niamni a·palosa ong·enga aro ian Meghalaya a·dokni kajina man·anio gimaaniba ong·enga ine Momin parakatenba, Meghalaya a·dok gita Bangladesh a·songona ro·ong salaniko champengatchina didiataha.
“Bhutan a·songni ro·ongrangko niam gri salbaengani a·sel Meghalaya a·dokna nangchakeanirang ong·enga. Bosturangko salruraanio a·dokna kajinarangko man·dapani ong·achim indiba Bhutan a·songni ro·ongrangko Meghalaya a·dok gita Bangladesh a·songona salanichi a·dokni kajina man·anio noksan ong·na nangskaenga,” ine Momin parakataha.
Momin-ni Chief Minister-na sedoatgipa chittio janapatani gitade, Bhutan a·songoni ro·ong salbaenggipa garirang, dingtang dingtang kajinarangko gamgijasa Bangladesh a·songona salangengani a·sel a·dokni kajina man·anio noksan ong·atako man·na nangengachim.
Iandake gimaatna nangenggipa kajinarangko dingtang dingtang nanga kamrangna jakkalna man·genchim ine janapatengon, Bhutan a·songoni Meghalaya a·dok gita Bangladesh a·songona ro·ong salruraaniko champengatchina Momin didiataha.
