TURA: A·gilsak gimikon Krismasni salko manina gita nisengsotokengon, ia salna Garo Hills-oba pilak manderangan, kusi ong·bee nisamsotokenga aro ia salko rimchaksona gita noktangtangko aro gittimrangko nitoate tarisamsotokaha.
Ia Krismasni salara Jisu Kristoni mandeko jokatna gita a·gilsako mande ong·e atchianiko maniani sal ong·a aro uandaken manderang, Jisu Kristoko an·tangtangni ka·tongrango atchiatna gitaba tarisamsotokaha.
Ia Krismasni somoio Salantini Janera, adita sak manderango, uamang maikai Krismasko manina chanchisoenga aro maikai tarisamsotokenga, sing·sandie ra·aha, hai an·ching uamangni kan·dike agananirangko iano sulsul nie ra·angna.
Banchie Kongkal: Ia bilsini Christmasko anga Christmas ong·na am·a gitan nikjaenga busy life ong·en. Nangnikanide angade da·osa December ja a·bachengako nangengachim neng·take dongna. Ia bilside Christmas-ode Gilja joke joljol nokona re·bae tusiaigen ine chanchienga.
Tengchi A Sangma: Ia bilsini Christmas-de gipin bilsirangna bate dingtange nikenga, saniba nokdangrangde tangka paisani gita neng·nikaniko man·e kusinian dongja gita nika. Indiba anga an·tangde ia bilside dingtange an·sengbate nika… ma·gipa pagipa baksa kusi ong·e Christmas-ko nichaksoanina. Angade ia bilsini Christmas-kode Isolni angko bilsi gimik tom·tome an·senge rakkianina kusi ong·e mittelan baksa Uni atchiani somoiko nichaksoe pita wanti tarie ripengrangko okame cha·ani ringanirangko sachie on·gen.
Mikkimchi Marak: Ia bilsini Christmas-o an·tangde bilsi gipinrangna bate sin·batna aro ku·cholsan pilak Christian-rangsan ong·gija gipin religion-rangba bakrimpaaniko nikna gita ka·donga. Neng·nikanirangde mongsongbate, kangal cholgrirangni chu·onga gita chola ba·ra donggijanina namen ka·sachakani ong·a, uamangna dakchakako nangnika. Christian ong·e Christian-ni daka rika bewal gita janggi tanggiparang ong·na nanga. Ia bilsini Christmas-ko anga an·tangde batanggimin Christmas-o dakjringbaa gitan apsan daken gilja re·e Jisu Kristoni atchianiko nichaksona miksongenga.
Witty Marak: Christmas daken nikjaenga an·sengan an·sengjaenga. An·sengani katchaaniko nangachim an·sengjaenga. Noko nape wal·tim chake pita cake cha·e roaigen.
Britney D Sangma: Ia bilsini Christmas-de angnade dingtang dake kusiniko pattianiko gital dake gisik ka·sroke nikenga aro batanggiminko niatgenchimode da·o nangenganide uan melie nangrime paako maako nogipako jonggipako nokni manderang gimikko gisik saatgija kusi ong·e donganiko nangengachim, uni gimin apsan damsan nangrime manina miksongenga.
